Ўзбекистонда ҳар йили 450—550 миллиард сўмдан зиёд маблағ аҳолига ичимлик суви етказиб бериш, унинг таъминотини янада яхшилашга сарфланмоқда. 2014 йилда 1 минг 90 километр ичимлик суви тармоқлари қуриш режалаштирилган. Ўтган даврда 520 километрдан кўпроқ масофадаги ишлар бажарилиб, 140 қишлоқ аҳоли пунктида сув таъминоти яхшиланди, деб хабар бермоқда ЎзА.
Сув ресурсларидан унумли ва мақсадли фойдаланиш, тизимдаги асбоб-ускуналарни таъмирлаш ҳамда сув иншоотларининг ишончли ва барқарор ишлашини таъминлаш «Ўзкоммунхизмат» агентлиги фаолиятининг асосий йўналишларидан.
– Туямўйин-Нукус, Туямўйин-Урганч, Дамхўжа ва Зомин туманлараро сув қувурлари, Чимён-Чорвоқ дам олиш ҳудудининг магистрал сув қувурлари агентлигимиз таркибига киради, – дейди «Ўзкоммунхизмат» агентлигининг минтақалараро сув қувурлари фаолиятини мувофиқлаштириш бош бошқармаси бошлиғи ўринбосари Тоҳир Ҳайдаров. – Минтақалараро сув қувурларининг умумий қуввати бир кеча-кундузда қарийб 800 минг куб метр бўлиб, қувурлар ўтган ҳудудлардаги шаҳар ва туман марказлари ҳамда қишлоқ аҳолисини сифатли ичимлик суви билан таъминлайди.
Осиё тараққиёт банки иштирокида «Қўқон ва Андижон шаҳарлари сув таъминоти ва канализацияси тизимлари ҳамда Фарғона, Марғилон ва Риштон шаҳарлари сув таъминоти тизимларини қайта тиклаш» лойиҳаси жорий қилинмоқда. Унга кўра, 2012—2015 йилларда мазкур шаҳарларда 55 километрлик ичимлик суви тармоқлари реконструкция қилиниб, 68 сув қувури ва 4 сув иншооти таъмирланади. Истеъмолчиларга ичимлик суви экологик жиҳатдан тоза ва саломатлик учун зарарсиз ҳолда, энг муҳими, ноқонуний равишда фойдаланиш имконини бермайдиган полиэтилен қувурлар орқали етказиб берилади.
Ўзбекистонда ичимлик суви таъминоти ва канализация тизимларини комплекс ривожлантириш ҳамда модернизация қилишнинг 2013—2020 йилларга мўлжалланган режаси асосида қирққа яқин лойиҳа бўйича тадбирлар олиб борилмоқда. Унга кўра, дастлаб бир нечта вилоятнинг сув иншоотлари, қувурлари ва тармоқлари реконструкция қилинади ва янгилари қурилади. Хусусан, Наманган вилоятида бир кеча-кундузда 300 минг куб метр сувни тозалаб берадиган сув иншоотини таъмирлаш ва шунча ҳажмдаги янги «Обод» сув тозалаш иншооти қурилиши давом этмоқда.
Айни пайтда аҳоли, хусусан, қишлоқ аҳолисини тоза ва сифатли ичимлик суви билан таъминлашга қаратилган тадбирлар изчил давом эттирилмоқда. Бунда Ўзбекистон Республикаси Вазирлар Маҳкамасининг жорий йил 25 февралда қабул қилинган «Республика аҳоли пунктларини сифатли ичимлик суви билан таъминлаш бўйича қўшимча чора-тадбирлар тўғрисида»ги қарори муҳим аҳамият касб этмоқда. Унга кўра, «Ўзкоммунхизмат» агентлиги тизимидаги корхоналарга етти йиллик муддатга етти фоизли лизинг асосида сув ташишга мўлжалланган 483 махсус техникани етказиб бериш белгиланган.
Бундан ташқари, Қорақалпоғистон Республикаси Вазирлар Кенгаши ва вилоятлар ҳокимликлари тасарруфидаги сув ташишга мўлжалланган 200 техника сув таъминоти корхоналари ҳисобига ўтказиб берилди. Қорақалпоғистон Республикасида 28, Сурхондарё вилоятида 30, Бухорода 30, Сирдарё вилоятидаги 14 тиркама ва махсус сув ташиш техникаси шулар жумласидандир. Мазкур техника воситалари кўмагида марказлаштирилган ичимлик суви таъминоти бўлмаган қишлоқлар, хусусан, тоғли ва чўл ҳудудлардаги аҳоли пунктларига режа асосида ичимлик суви етказиб берилади.
Изоҳ (0)