2014-yilning 24—27-aprel kunlari Toshkent viloyati Bo‘stonliq tumanida joylashgan “Allyur” ot sporti klubida ot sporti bo‘yicha Jahon kubogining Markaziy Osiyo ligasi birinchi bosqich musobaqalari o‘tkaziladi. Bu haqda O‘zbekiston Milliy Olimpiya qo‘mitasi matbuot xizmati xabar berdi.
O‘zbekiston ot sporti federatsiyasidan ma’lum qilinishicha, mazkur musobaqada o‘zbekistonlik mohir chavandozlar bilan birga Ozarbayjon, Armaniston, Ukraina, Rossiya, O‘zbekiston, Qozoqiston, Turkmaniston va Tojikiston sportchilari yettita dastur bo‘yicha o‘z chiqishlarini namoyish etadi.
Musobaqada yurtimiz sharafini G‘ayrat Nazarov, Vladimir Shmelev, Umid Komilov, Isajon Sodiqov, Ibrohim Yo‘ldoshev kabi jami 25 nafar yetakchi chavandozimiz himoya qiladi.
Jahon kubogining ikkinchi bosqichi 22—25-may kunlari Qirg‘iziston poytaxti Bishkek shahrida o‘tkazilsa, uchinchi bosqichi esa 1—5-iyul kunlari Qozog‘istonning Astana shahrida o‘tkaziladi.
Ma’lumot uchun. 24-aprel kuni soat 16:00 da “Allyur” ot sporti klubida Jahon kubogi saralash bosqichi musobaqalari oldidan matbuot anjumani o‘tkaziladi.
Izoh (0)