Бўстонлиқда от спорти бўйича Жаҳон кубогининг Марказий Осиё лигаси баҳслари ўтказилади

2014 йилнинг 24—27 апрель кунлари Тошкент вилояти Бўстонлиқ туманида жойлашган «Аллюр» от спорти клубида от спорти бўйича Жаҳон кубогининг Марказий Осиё лигаси биринчи босқич мусобақалари ўтказилади. Бу ҳақда Ўзбекистон Миллий Олимпия қўмитаси матбуот хизмати хабар берди.

Ўзбекистон от спорти федерациясидан маълум қилинишича, мазкур мусобақада ўзбекистонлик моҳир чавандозлар билан бирга Озарбайжон, Арманистон, Украина, Россия, Ўзбекистон, Қозоқистон, Туркманистон ва Тожикистон спортчилари еттита дастур бўйича ўз чиқишларини намойиш этади.

Мусобақада юртимиз шарафини Ғайрат Назаров, Владимир Шмелев, Умид Комилов, Исажон Содиқов, Иброҳим Йўлдошев каби жами 25 нафар етакчи чавандозимиз ҳимоя қилади.

Жаҳон кубогининг иккинчи босқичи 22—25 май кунлари Қирғизистон пойтахти Бишкек шаҳрида ўтказилса, учинчи босқичи эса 1—5 июль кунлари Қозоғистоннинг Астана шаҳрида ўтказилади.

Маълумот учун. 24 апрель куни соат 16:00 да «Аллюр» от спорти клубида Жаҳон кубоги саралаш босқичи мусобақалари олдидан матбуот анжумани ўтказилади.