O‘zbekistonda internet tezligi 2013-yil iyuliga nisbatan soniyasiga 1,5 megabitga pasaydi

Mart oyi yakunlariga ko‘ra, O‘zbekistonda internet tezligi o‘rtacha sekundiga 2,33 megabitni tashkil etdi. Net Index Explorer ma’lumotlariga ko‘ra, ushbu ko‘rsatkich bilan O‘zbekiston jahonning 190 mamlakati orasida 174-o‘rinni egallab turibdi, deb yozadi “Kun”.

Net Index ma’lumotlariga ko‘ra, ko‘chirib olish tezligi bo‘yicha O‘zbekistonda eng yaxshi ko‘rsatkich Ucell’ga tegishli – sekundiga 9,59 megabit. Turon Telecom (6,19 megabit), Uzonline (5,31 megabit), Beeline (2,87 megabit) va “Sharq Telekom” (2,44 megabit) kabi internet-servis provayderlar va operatorlar ham internet tezligi yaxshilar qatoriga kirgan.

Qayd etish joiz, 2013-yilning 4-aprelidan 2014-yilning 3-apreligacha bo‘lgan vaqt oralig‘ida O‘zbekiston internet tezligi bo‘yicha jahon mamlakatlari orasida 171-o‘rinni egallab turibdi. Unga ko‘ra, O‘zbekistonda internetdan ko‘chirish tezligi sekundiga 2,4 megabit, yuklash tezligi 2 megabit, mobil internetda ko‘chirish tezligi 1,6 megabit, yuklash tezligi esa 0,5 megabitga teng.

O‘tgan bir yil ichida eng yuqori tezlik, Net Index ma’lumotlariga ko‘ra, 2013-yilning iyul oyida kuzatilgan bo‘lib, o‘shanda tezlik sekundiga 3,73 megabitga yetgan, bu esa 190 mamlakat orasida 135-o‘rinni egallash imkonini bergan edi.

Taqqoslash uchun, so‘nggi bir yillik natijalar bo‘yicha, Qozog‘iston 56- (tezlik – 13,83 megabit), Qirg‘iziston 81- (9,35 megabit), Tojikiston 68- (11,28 megabit), Ozarbayjon 142-o‘rinni (4,31 megabit) egallab turibdi.

Umumiy reyting bo‘yicha eng tez internet Gongkongda (75,46 megabit), shuningdek, Singapur (60,5), Ruminiya (57,73), Janubiy Koreya (51,44), Shveysariya (48,83), Andorra (44,79), Litva (42,26), Shvetsiya (41,88), Yaponiya (41,85), Gollandiya (40,7), Makao (40,09) va Tayvanda (40) 40 megabitdan kam emas.

Buyuk Britaniyada internet tezligi 26,68 megabitni tashkil qilsa (24-o‘rin), AQShda 22,56 (36-o‘rin), Rossiyada 22,17 (37-o‘rin), Xitoyda esa 18,24 megabitga teng (47-o‘rin).

Ma’lumot o‘rnida: O‘zbekiston Aloqa, axborotlashtirish va telekommunikatsiyalar Davlat qo‘mitasi ma’lumotlariga ko‘ra, 2014-yil yanvar oyi holatiga ko‘ra, O‘zbekistonning xalqaro internet tarmog‘iga ulanish tezligi sekundiga 10,3 gigabitni tashkil qiladi.