Rossiya Davlat dumasi raisi Vyacheslav Volodin Finlyandiya hukumati Rossiyaga qarshi siyosati tufayli mamlakatni “rivojlanish imkoniyatidan mahrum qilgani”ni aytdi. Bu haqda “Kommersant” xabar berdi.
Uning so‘zlariga ko‘ra, Rossiya bilan iqtisodiy hamkorlik Finlyandiyaning sharqiy hududlariga farovonlik olib keldi. Biroq mamlakat rahbariyati “temir pardani tortib, o‘z fuqarolarini jazoladi”.
Hozir Finlyandiya Yevropa Ittifoqidan Rossiya bilan chegaradosh hududlarni moliyalashtirish uchun 10 milliard yevro so‘ramoqda. Bu Finlyandiyaning NATOga a’zo bo‘lishining dastlabki natijalari hamda bu orqali suverenitetni yo‘qotishdan boshqa narsa emas. Ular bu orqali kimni jazoladi? — dedi Volodin.
Davlat dumasi raisi Finlyandiyada sayyohlar oqimi to‘xtagani, korxonalar yopilayotganini da’vo qildi.
Finlyandiya 2023-yilning kuzida noqonuniy muhojirlar oqimi sababli Rossiya bilan chegaradagi o‘tkazish punktlarini yopishni boshladi. Bu choralar bir necha marta uzaytirildi va 15-apreldan boshlab barcha quruqlikdagi nazorat punktlari (“Imatra”, “Kuusamo”, “Niirala”, “Nuyyamaa”, “Rayya-Yosepi”, “Salla”, “Vaalimaa” va “Vartius”) noma‘lum muddatga “keyingi ogohlantirishgacha” yopildi.
Bundan tashqari, Finlyandiya Saymenskiy kanali orqali harakatlanishni to‘xtatdi, shuningdek, “Haapasaari“ va “Santio” dengiz o‘tish punktlarini yopdi. Finlyandiya, shuningdek, Rossiya bilan chegarada panjara qurmoqda.
Izoh (0)