Россия Давлат думаси раиси Вячеслав Володин Финляндия ҳукумати Россияга қарши сиёсати туфайли мамлакатни “ривожланиш имкониятидан маҳрум қилгани”ни айтди. Бу ҳақда “Коммерсант” хабар берди.
Унинг сўзларига кўра, Россия билан иқтисодий ҳамкорлик Финляндиянинг шарқий ҳудудларига фаровонлик олиб келди. Бироқ мамлакат раҳбарияти “темир пардани тортиб, ўз фуқароларини жазолади”.
Ҳозир Финляндия Европа Иттифоқидан Россия билан чегарадош ҳудудларни молиялаштириш учун 10 миллиард евро сўрамоқда. Бу Финляндиянинг НАТОга аъзо бўлишининг дастлабки натижалари ҳамда бу орқали суверенитетни йўқотишдан бошқа нарса эмас. Улар бу орқали кимни жазолади? — деди Володин.
Давлат думаси раиси Финляндияда сайёҳлар оқими тўхтагани, корхоналар ёпилаётганини даъво қилди.
Финляндия 2023 йилнинг кузида ноқонуний муҳожирлар оқими сабабли Россия билан чегарадаги ўтказиш пунктларини ёпишни бошлади. Бу чоралар бир неча марта узайтирилди ва 15 апрелдан бошлаб барча қуруқликдаги назорат пунктлари (“Иматра”, “Куусамо”, “Ниирала”, “Нуйямаа”, “Райя-Ёсепи”, “Салла”, “Ваалимаа” ва “Вартиус”) номаълум муддатга “кейинги огоҳлантиришгача” ёпилди.
Бундан ташқари, Финляндия Сайменский канали орқали ҳаракатланишни тўхтатди, шунингдек, “Ҳаапасаари“ ва “Сантио” денгиз ўтиш пунктларини ёпди. Финляндия, шунингдек, Россия билан чегарада панжара қурмоқда.
Изоҳ (0)