AQSH rossiyalik senator va tadbirkor Suleyman Karimovga tegishli 325 million dollarlik hashamatli yaxtani yopiq kimoshdi savdosiga qo‘ydi. Bu haqda NBC News xabar berdi.
“Amadea” nomli yaxta 2022-yilda musodara qilingan bo‘lib, yopiq auksion 10-sentyabr kuni o‘tkaziladi. Ishtirokchilar auksionga kirish uchun 10 million dollar miqdorida garov puli to‘lashi shart. Yaxtaning bozor qiymati 325 million dollar atrofida baholanadi, biroq savdoda u arzonroq narxda sotilishi mumkin.
“Amadea” 2022-yil aprel oyida bojxona ruxsatisiz Fijining mutlaq iqtisodiy hududiga kirganida ushlangan. 3-may kuni Fiji sudi kemani AQSHga musodara qilishga ruxsat bergan. Uzunligi 106 metr bo‘lgan yaxta vertolyot maydonchasi, hovuz, dengiz qisqichbaqasi uchun akvarium va qo‘lda bezatilgan royalga ega. Auksion saytida uning oltita palubasi va ichki qismi batafsil tasvirlangan suratlar joylashtirilgan.
Federal qidiruv byurosi hujjatlarida yaxtaning haqiqiy egasi sifatida Suleyman Karimov ko‘rsatilgan. Biroq rasmiy hujjatlarda u “Rosneft” sobiq bosh direktori Eduard Xudaynatov nomida rasmiylashtirilgan. Xudaynatov, shuningdek, prezident Vladimir Putinga tegishli deb hisoblangan “Shahrizoda” yaxtasining ham rasmiy egasi sifatida qayd etilgan.
Megayacht News nashriga ko‘ra, “Amadea” Rossiyaning Ukrainaga keng ko‘lamli hujumi munosabati bilan musodara qilingan birinchi yaxta hisoblanadi. Uni sotishga yaxtani saqlash xarajatlarining yuqoriligi sabab bo‘lmoqda. Chunki ekipaj va xizmat ko‘rsatish uchun oylik xarajatlar 922 ming dollar atrofida baholanadi.
Izoh (0)