O‘zbekiston prezidenti Shavkat Mirziyoyev va Germaniya kansleri Olaf Shols 16-sentyabr kuni qo‘shma Boshqaruv kadrlarini tayyorlash maktabini ishga tushirish marosimida ishtirok etdi.
-W6eQMZlx.jpg)
Prezident matbuot xizmatining ma’lum qilishicha, loyiha O‘zbekiston prezidenti huzuridagi davlat boshqaruvi akademiyasi va Davlat xizmatini rivojlantirish agentligi tomonidan Xanns Zaydel jamg‘armasi hamda Bavariya davlat boshqaruvi maktabi bilan hamkorlikda amalga oshirildi.
Mutasaddilar videoaloqa orqali yetakchilarga loyiha haqida batafsil ma’lumot berdi. Uning asosiy maqsad va vazifalari O‘zbekiston hududlarida boshqaruv kadrlarining ijtimoiy-iqtisodiy rivojlanish, xorijiy investitsiyalarni jalb etish va ilg‘or texnologiyalarni o‘zlashtirish borasidagi salohiyatini oshirishdan iborat.
Germaniya kansleri Olaf Shols Shavkat Mirziyoyevning taklifiga binoan 15-sentyabr kuni Samarqandga kelgandi. Tashrif davomida oliy darajadagi muzokaralar o‘tkazildi. Unda O‘zbekiston—Germaniya ko‘p qirrali hamkorligini yanada rivojlantirish masalalari ko‘rib chiqildi.
Muzokaralar yakunida Shavkat Mirziyoyev va Germaniya kansleri Olaf Shols Qo‘shma deklaratsiyani qabul qildi, 8 ta ikki tomonlama hujjat imzolandi. Bundan tashqari, 2024—2026-yillarga mo‘ljallangan Texnologik sheriklik va sanoat kooperatsiyasi dasturi qabul qilindi, shuningdek, O‘zbekiston va Germaniyaning yetakchi korxonalari darajasida bir qator bitim va shartnomalar tuzildi.
Izoh (0)