AQSHning qirg‘oqbo‘yi shtatlarida Vibrio vulnificus nomli go‘sht yeyuvchi bakteriyasi bilan zararlanish holatlari ko‘paymoqda. Bu haqda The Daily Tribune xabar bermoqda.
Vibrio vulnificus mamlakat plyajlarini to‘liq egallab olgan. AQSH kasalliklarni nazorat qilish va oldini olish markazlari (CDC) 11 shtatda, jumladan, Florida va Luizianada infeksiya tarqalganini tasdiqlagan. Bu shtatlarning har birida 20 va 17 ta o‘lim holati qayd etilgan.
Ommaviy axborot vositalarida “go‘sht yeyuvchi” deb ta’riflangan bakteriya iliq sho‘r suvda yashaydi va xom dengiz mahsulotlarini iste’mol qilish yoki ochiq yaralar orqali organizmga kirishi mumkin. Har beshinchi zararlanish holati 48 soat ichida o‘lim bilan yakunlanadi.
Mutaxassislar Vibrio vulnificus’ning hozirgi tarqalishini iqlim o‘zgarishi bilan bog‘lamoqda — suv haroratining ko‘tarilishi bakteriyaning ko‘payishi uchun qulay sharoit yaratadi. Kasallikning dastlabki belgilari qusish, ich ketishi va terida pufakchalar paydo bo‘lishi bilan namoyon bo‘ladi. Xavf guruhiga immuniteti zaif va surunkali kasalliklarga chalingan odamlar kiradi.
CDC ochiq jarohatlar bilan cho‘milmaslikni, dengiz mahsulotlarini yaxshilab pishirishni va dengiz suvi bilan aloqadan so‘ng g‘alati belgilar paydo bo‘lganda zudlik bilan tibbiy yordamga murojaat qilishni tavsiya etadi. Bu so‘nggi yillardagi ikkinchi yirik tarqalish hisoblanadi. Bundan avval 2023-yilda Shimoliy Karolina va Texasda ham shunga o‘xshash holatlar qayd etilgan edi.
Izoh (0)