Shimoliy Koreya yetakchisi Kim Chen Inning singlisi Kim Yo Jong Janubiy Koreya prezidenti Li Je Myongning tinchlik bo‘yicha murojaatlarini yana rad etib, uni ikkiyuzlamachilikda aybladi. Bu haqda mahalliy nashrlarga tayanib, Al Jazeera xabar berdi.
Kim Yo Jongning aytishicha, Pxenyan hech qachon Seulni diplomatik hamkor sifatida ko‘rmaydi. Ushbu bayonot Janubiy Koreya va AQSHning qo‘shma harbiy mashg‘ulotlari fonida yangramoqda. Har yili o‘tkaziladigan bu mashg‘ulotlar Shimoliy Koreyaning yadro qudratiga qarshi yangi mudofaa strategiyalarini sinovdan o‘tkazishni ko‘zda tutadi.
Kim Yo Jong mashg‘ulotlarni “bosqinchilikka tayyorgarlik” deb baholab, Janubiy Koreya prezidentini “ikkiyuzlamachi”likda ayblagan:
“Bir tarafdan tinchlik haqida gapiradi, ikkinchi tarafdan urush o‘yinlarini davom ettiradi”.
Unga ko‘ra, Janubiy Koreya “samimiy va ishonchli” emas, shuning uchun mamlakat KXDR uchun diplomatik hamkor bo‘la olmaydi. Janub prezidenti Li Je Myong so‘nggi kunlarda Pxenyanni muloqotga qaytishga chaqirib, 2018-yilda imzolangan va chegaradagi keskinlikni kamaytirishga qaratilgan harbiy bitimni tiklashga tayyorligini bildirgandi. Prezident, shuningdek, Shimoliy Koreyaning siyosiy tizimiga hurmat bilan qarashini va dushmanona harakatlarni ko‘zlamasligini aytgan.
Biroq Kim Yo Jong bunday takliflarni “havoyi orzu” deb baholab, Janubiy Koreyaning konservatorlar yoki liberallar qo‘lida ham doimo Shimolga qarshi kurash olib borganini ta’kidlagan. Shimoliy Koreya rahbari Kim Chen In ham AQSH–Janubiy Koreya mashg‘ulotlarini “urushga tayyorgarlik” deya baholamoqda. Pxenyan bunga javoban yadroviy qurollarni ko‘paytirishni ma’lum qilgan.
Izoh (0)