Ukraina prezidenti Vladimir Zelenskiy Germaniya bosh vaziri Fridrix Merts bilan suhbat chog‘ida Vladimir Putin bilan uchrashuvning turli formatlari muhokama qilinayotganini bildirgan. Bu haqda UNIAN agentligi xabar berdi.
Zelenskiyning qayd etishicha, Ukraina Yevropaning bir qismi, shu sababdan urush Yevropa hududlarida bo‘layotgani aytilmoqda.
Shuningdek, Ukraina yetakchisi mamlakat Yevropa Ittifoqiga a’zo bo‘lish uchun muzokaralar jarayonida ekanligini yana bir bor ta’kidlagan:
“Ukraina va Germaniya urushni imkon qadar tezroq, munosib tinchlik shartlari asosida yakunlash zarurligini birdek anglaydi. Bu urushning yakunlanishi bo‘yicha shartlar Yevropa uchun o‘n yilliklarga yetarli xavfsizlik sharoitlarini belgilaydi.
Urush aynan Yevropada kechmoqda va Ukraina — Yevropaning ajralmas qismidir. Biz allaqachon Yevropa Ittifoqiga a’zo bo‘lish bo‘yicha muzokaralar o‘tkazmoqdamiz. Shuning uchun Yevropa ushbu jarayonlarning bevosita ishtirokchisiga aylanishi lozim”, degan Zelenskiy.
Ta’kidlanishicha, Amerika Qo‘shma Shtatlari, Yevropa va Ukrainaning xavfsizlik masalalari bo‘yicha mas’ul shaxslari tinchlik masalasida qarashlarini muvofiqlashtirish uchun onlayn uchrashuv o‘tkazadi.
Zelenskiyning so‘zlariga ko‘ra, Ukraina va Rossiya o‘rtasida ikki marta muzokara o‘tkazilsa, uchinchi uchrashuv AQSH ishtirokida bo‘lishi mumkin:
“Tinchlik yo‘lida yetakchilar darajasidagi uchrashuvlarning turli potensial formatlari muhokama qilindi: ikkita ikki tomonlama va bitta uch tomonlama uchrashuv tashkil qilinishi mumkin. Ukraina muzokaralardan cho‘chimaydi va Rossiya tomonining ham shunday jasorat bilan yondashishini kutmoqda. Urushni yakunlash vaqti keldi. Yordam berayotganlarning barchasiga rahmat”, degan Ukraina yetakchisi.
Manbaning yozishicha, Zelenskiy urushni yakunlash bo‘yicha uchta qadamni sanab o‘tgan: Rossiya tomonidan qotilliklarni to‘xtatish, uzoq muddatli tinchlik uchun yetakchilar darajasida uchrashuvlar o‘tkazish, Ukraina uchun uzoq muddatli xavfsizlikni kafolatlash.
The New York Times’ning yozishicha, AQSH prezidenti Donald Tramp Rossiya prezidenti Vladimir Putin bilan shaxsan uchrashishni rejalashtirmoqda. Shundan so‘ng, Tramp Zelenskiy va Putin ishtirokida muzokara o‘tkazishni maqsad qilgan.
Kreml bayonotiga ko‘ra, Rossiya va AQSh Tramp bilan Putin uchrashuviga tayyorgarlikni allaqachon boshlab yuborgan. Bundan tashqari, Trampning maxsus vakili Stiv Uitkoff Moskvadagi tashrifi davomida Putin, Tramp va Ukraina prezidenti Vladimir Zelenskiy ishtirokida uch tomonlama uchrashuv o‘tkazish g‘oyasini ilgari surgan. Biroq Moskva bu borada hech qanday rasmiy izoh bermagan.
Izoh (0)