BMT bosh kotibi Antoniu Guterrish, Yaponiya bosh vaziri Sigeru Isiba va Nagasaki shahri meri Siro Sudzuki Nagasaki shahriga atom bombasi tashlanganining 80 yilligi munosabati bilan o‘tkazilgan marosimda 1945-yilda AQSHning bu shaharga hujum qilganini tilga olishmadi. Marosim asosiy telekanallar va internet tarmog‘ida jonli efirda namoyish etilgan.
“Bugun, 80 yil oldin, bu shahar bitta atom bombasi tufayli bir zumda na daraxti, na o‘ti qolgan kuygan yerga aylandi. Xirosimaga tashlangan bombadan ham kuchliroq bo‘lgan plutoniy bombasi bir lahzada 70 ming kishining hayoti va kelajagini olib qo‘ydi, ularning aksariyati oddiy fuqarolar edi. Urush olovidan omon qolganlar esa uzoq vaqt davomida sog‘liqlariga yetkazilgan zarardan aziyat chekishdi”, dedi Isiba.
BMT bosh kotibi o‘rinbosari, qurolsizlanish masalalari bo‘yicha oliy vakil Idzumi Nakamitsu tomonidan o‘qilgan BMT bosh kotibi Antoniu Guterrishning maktubida ham bombani qaysi davlat tashlagani haqida hech narsa aytilmagan.
“Nagasaki bitta atom bombasidan halokatli zarar ko‘rgan kundan buyon bugun 80 yil to‘ldi. O‘n minglab qurbonlar orasida yaqinlarini yo‘qotganlarning qayg‘usiga hamdardmiz. Biz atom bombardimonidan jabr ko‘rgan xibakusyalarga ularning jasorati va guvohliklari uchun minnatdorlik bildiramiz”, dedi Nakamitsu.
An’anaga ko‘ra, marosim boshida atom portlashidan kuyib vafot etayotganlar suv so‘ragani uchun yodgorlik oldiga suv qo‘yilgan. Shundan so‘ng shahar meri, bosh vazir, vazirlar mahkamasi a’zolari, partiya rahbarlari yodgorlik poyiga gulchambarlar qo‘yishgan.
Bu yil marosimda 95 ta davlat vakillari ishtirok etmoqda.
1945-yil 9-avgust kuni soat 11:02 da Amerika harbiy-havo kuchlari tomonidan Nagasakiga quvvati 20 kilotonna va og‘irligi to‘rt yarim tonna bo‘lgan Fat Man (“Semiz odam”) atom bombasi tashlandi. Bomba shahar ustidan 503 metr balandlikda portladi. Portlash markazidan bir kilometr radiusda bo‘lganlarning barchasi halok bo‘ldi.
Portlashdan keyingi birinchi yilning o‘zida 70 mingdan ortiq odam vafot etdi. Jabrlanganlarning 50 foizdan ortig‘i kuyish, 30 foizgacha qismi zarba to‘lqinidan shikastlanish, 20 foizi o‘tuvchi radiatsiya ta’siriga uchradi. Yong‘inlar turar joy binolarining katta qismini vayron qildi.
Izoh (0)