Janubiy Koreyaning sobiq prezidenti Yun Sok Yolning rafiqasi Kim Kon Xi 6-avgust kuni korrupsiya ayblovlari bo‘yicha so‘roq qilinmoqda. Bu haqda mahalliy OAVga tayanib, Associated Press xabar berdi.
Ma’lum qilinishicha, so‘roq Seulda yangi liberallar hukumati tomonidan o‘tkazilayotgan 3 ta maxsus tergovdan biri doirasida amalga oshirilmoqda. Tergovda sobiq prezidentning rafiqasi aksiyalarning narxini manipulyatsiya qilish, pora olish va partiya nomzodlarini tanlash jarayoniga noqonuniy aralashishda gumon qilinmoqda. Kim Kon Xi jurnalistlarga shunday intervyu berdi:
“Men arzimas odam bo‘lib turib, xalqni tashvishga solganim uchun uzr so‘rayman”.
So‘roq paytida Seuldagi prokuror idorasi oldida Yunning o‘nlab tarafdorlari Janubiy Koreya va AQSH bayroqlari bilan to‘planib, uni qo‘llab-quvvatlab turgan.
Sobiq prezident Yun Sok Yol aprel oyida mamlakatda nojoiz harbiy holat joriy etgani sabab prezidentlik lavozimidan chetlatilib, qamoqqa olingan edi. U mart oyida ozod etilgan bo‘lsa-da, dalillarni yo‘q qilishga uringanligi tufayli iyul oyida yana qayta hibsga olingan. Hozirda u isyon ko‘targanlik va boshqa og‘ir jinoyatlar bo‘yicha sud qilinmoqda.
Tergovchilarning ma’lum qilishicha, o‘tgan hafta sobiq prezidentni rafiqasining ishi bo‘yicha so‘roq qilishga harakat qilingan, biroq u qamoqxona formasini yechib, ich kiyimda yerga yotib olib, qarshilik ko‘rsatgan. Hozirda prokurorlar Yunning advokatlari bilan muzokara olib bormoqda.
Yun va uning rafiqasi 2022-yilgi parlament saylovida ma’lum bir nomzodni ilgari surish uchun konservativ “Xalq qudrati” partiyasiga bosim o‘tkazganlikda gumon qilinmoqda. Tergovga ko‘ra, bu ishda saylov natijalarini o‘rganuvchi agentlik asoschisi Myon Te Gyun vositachilik qilgan.
Kim Kon Xi, shuningdek, biznes imtiyozlari bilan ta’minlash evaziga cherkov xodimidan zargarlik buyumlarini olish va aksiya narxini manipulyatsiya qilishda gumon qilinmoqda. Prezident bo‘lgan davrida Yun bu ayblovlarni siyosiy hujum deb atab, tergovga ruxsat bermagan edi.
Eslatib o‘tamiz, 2024-yil 3-dekabr kuni Yun tarafidan e’lon qilingan harbiy holat bir necha soat ichida tugatilgan. 14-dekabr kuni parlament uni impichment qilib, aprel oyida esa Konstitutsiyaviy sud Yun Sok Yolni rasman lavozimidan chetlatgan edi.
Iyunda bo‘lib o‘tgan muddatdan oldingi prezidentlik saylovlarida liberal nomzod Li Je Myong g‘alaba qozongan. Shundan keyin, u Yunning harbiy holat joriy qilishi, uning rafiqasiga oid ayblovlar va 2023-yilgi suv toshqini chog‘ida halok bo‘lgan dengiz piyodasi ishini tergov qilishga buyruq bergan edi.
Izoh (0)