AQSH prezidenti Donald Tramp 6-avgust kuni Rossiya rahbari Vladimir Putin bilan kelasi haftada uchrashishi mumkinligini bildirdi. Unga ko‘ra, uchrashuvda Ukrainadagi urushini tugatish masalasi ko‘rib chiqiladi. Bu haqda CNN xabar berdi.
Trampning bildirishicha, Putin bilan AQSHning maxsus vakili Stiv Vitkof o‘rtasidagi Moskvada bo‘lgan uchrashuv samarali bo‘lgan, biroq aniq yutuqlarga erishilmagan. AQSH davlat kotibi Marko Rubio ushbu uchrashuvdan so‘ng Rossiyaning tinchlik sulhi uchun qanday shartlari borligini yanada aniqroq tushunganini bildirgan.
Kutilayotgan uchrashuv taklifi Putin tomonidan berilgan. Xususan, Rossiya rahbari oldin Tramp bilan, so‘ngra Ukraina prezidenti Vladimir Zelenskiy bilan uch tomonlama muloqot o‘tkazishni taklif qilgan. Muzokaralar joyi hali belgilanmagan, lekin uchrashuv kelasi bir-ikki hafta ichida o‘tkazilishi rejalashtirilmoqda.
“Bugun prezident Putin bilan juda yaxshi muzokaralar o‘tkazildi. Oldimizda urushni tugatish uchun juda yaxshi imkoniyatlar turibdi. Bu yo‘lning oxiri. Bunga qadar uzoq yo‘l bosib o‘tildi, lekin u hali hamon davo etmoqda. Ammo tez orada uchrashuv o‘tkazilishi ehtimoli katta”, degan Tramp oval kabinetda.
Tramp so‘nggi kunlarda agar Rossiya Ukrainada urushni tugatish kelishuviga rozi bo‘lmasa, ruslardan neft xarid qiladigan davlatlarga ikkilamchi 100 foizlik sanksiyalar joriy etish bilan tahdid qilib kelmoqda.
Bu orada, Rossiya hujumlari Ukraina bo‘ylab davom etmoqda. Jumladan, o‘tgan so‘nggi sutkada ukrainaliklardan kamida 6 kishi halok bo‘lgan. Zaporojye viloyatidagi dam olish maskaniga berilgan zarbada bolalar ham jarohat olgani xabar qilinmoqda. Bundan tashqari, Odessa viloyatidagi gaz stansiyasiga qilingan hujum yuzlab oilalarni gazsiz qoldirgan. Zelenskiy bu hujumni qish mavsumiga tayyorgarlikka qaratilgan qasddan zarba sifatida baholamoqda.
Ma’lumot uchun, Rossiya va AQSH rahbarlari oxirgi marta 2021-yilda Shveysariyaning Jeneva shahrida bo‘lib o‘tgan sammit chog‘ida uchrashgan edi. O‘sha paytda Qo‘shma Shtatlar prezidenti lavozimida Jo Bayden bo‘lgan. Donald Tramp esa shaxsan so‘nggi marta Putin bilan 2019-yil iyun oyida Yaponiyaning Osaka shahrida o‘tkazilgan G20 sammitida ko‘rishgan. Ikki rahbar orasidagi eng muhim va uzun muzokara 2018-yil iyulida Finlyandiyaning Helsinki shahrida bo‘lib o‘tgan.
Izoh (0)