Buyuk Britaniyada Mango laqabli gapiruvchi to‘tiqush politsiyaga giyohvand moddalar savdosi bilan shug‘ullanuvchi jinoiy guruhni aniqlashda yordam berdi. Bu haqda People xabar berdi.
To‘tiqush narkotik sotuvchi guruh boshlig‘i Adam Garnettning sevgilisiga tegishli bo‘lgan. Mango to‘tisi “ikkitasi 25 ga” kabi iboralarni takrorlay olgan. Bunday ibora kokain savdosidagi narxga ishora qilgan.
Blekpul shahrida o‘tkazilgan tintuv davomida politsiya katta miqdorda geroin, kokain, ketamin va kannabisni topgan. Shuningdek, tergovchilar Garnettning telefonida giyohvand moddalar, pul va gapiruvchi to‘tiqush bilan bog‘liq videolarni aniqlagan. Videolardan birida Mango pullar bilan o‘ynab yurgan va sotuvchilarning iboralarini takrorlagan.
Tergovga ko‘ra, 35 yoshli Adam Garnett 2023–2024-yillarda qamoqxonada bo‘lishiga qaramay, mobil telefon va Wi-Fi orqali guruhni boshqarib turgan. U jinoyat sodir etgani uchun qo‘shimcha 19,5 yilga, uning sevgilisi esa 12 yilga ozodlikdan mahrum etilgan.
Sud oldiga jami 15 kishi olib chiqilgan, ammo ikki nafar ayblanuvchi sudga kelmagan, ularga nisbatan hibsga olish orderi chiqarilgan. To‘tiqush Mangoning keyingi taqdiri noma’lumligicha qolmoqda.
- Ma’lumot o‘rnida, aprel oyida AQSHda gapiruvchi to‘tiqush o‘z egasi haqidagi kichik bir tafsilotni aytib, jinoiy ish bo‘yicha tergovni yakunlashga yordam bergan edi.
- Mazkur jinoyat 2015-yilda yuz bergan.
- O‘shanda Glenna Dyuram Michigan shtatidagi uyida turmush o‘rtog‘i Martinni otib o‘ldirgan, shundan so‘ng o‘zini ham o‘ldirishga uringan, biroq muvaffaqiyatsizlikka uchragan.
Izoh (0)