Google kompaniyasi Janubiy Koreya milliy xavfsizlik siyosatiga amal qilgan holda sun’iy yo‘ldosh tasvirlariga ayrim o‘zgartirishlar kiritishini ma’lum qildi. Unga ko‘ra, endilikda mamlakat hududidagi harbiy obyektlar xiralashtirib ko‘rsatiladi. Bu haqda The Korea Herald xabar berdi.
Bu holat mamlakat hukumati yuqori aniqlikdagi xarita ma’lumotlarini ommaga ulashishga ruxsat berish-bermaslik masalasini ko‘rib chiqayotgan bir paytda yuz bermoqda. Google’ning ta’kidlashicha, kompaniya endi Janubiy Koreyaning maxfiylik siyostini inobatga oladi.
Kompaniya 5-avgust kuni e’lon qilgan blog postida o‘zining global axborot xizmatini tashkil etish, uni ommaga qulay va foydali qilish missiyasi haqida so‘z yuritgan. Xususan, bu borada Google Maps asosiy rol o‘ynashi ta’kidlangan. Shuningdek, kompaniya Janubiy Koreyda xarita bilan bog‘liq bir qancha muammolar borligini sanab o‘tgan.
“Har yili Janubiy Koreyaga 10 milliondan ortiq xorijlik tashrif buyuradi. Ammo ular bu yerga qadam qo‘ygan zahoti turli muammolarga duch keladi”, deyiladi kompaniya bayonotida.
Gap shundaki, Google xaritalarining yo‘nalish bo‘yicha harakatlanishni ko‘rsatuvchi (turn-by-turn) funksiyasi Janubiy Koreyada ishlamaydi. Bu butun dunyodagi kamdan-kam uchraydigan istisnolardan biri sanaladi.
Google rasmiylariga ko‘ra, ular Janubiy Koreya hukumati bilan xizmatlarini to‘liq faollashtirish masalasida muntazam muloqot olib bormoqda. Jumladan, bahsli masalalar bo‘yicha kelishuvga erishishga harakat qilinmoqda.
Google’ning ta’kidlashicha, 1:25 000 o‘lchamdagi xarita tasviri navigatsiya jarayoni uchun yetarli emas va juda xira hisoblanadi. Shuning uchun, kompaniya va mamlakat hukumati xarita tasvirini 1:5 000 o‘lcham etib belgilashga kelishib olgan. Ammo sun’iy yo‘ldosh tasvirlariga to‘xtalar ekan, Google bu suratlarni hukumatdan emas, balki ochiq bozorga ega tijorat provayderlaridan sotib olishini ta’kidlagan.
“Maxfiy obyektlarni asl sun’iy yo‘ldosh tasvirlarida to‘g‘ridan to‘g‘ri xiralashtirish eng samarali usuldir. Biz hukumat bilan birgalikda ushbu obyektlarni yashirish alternativlarini ishlab chiqmoqdamiz”, dedi kompaniya vakillaridan biri.
Janubiy Koreya yer, infratuzilma va transport vazirligi 8-avgust kuni milliy xarita ma’lumotlarini ommaga taqdim etish bo‘yicha Google’ning so‘rovini ko‘rib chiqish uchun maxsus yig‘ilish o‘tkazishi rejalashtirilgan. Ushbu qaror aslida may oyida e’lon qilinishi kerak edi. Biroq u AQSH va Seul o‘rtasidagi savdo muzokaralari davom etayotgani bois kechiktirilgandi.
Ma’lumot uchun, 2011 va 2016-yillarda ham Google xuddi shunday so‘rov bilan Jabuniy Koreya hukumatiga murojaat qilgandi. Biroq mamlakat hukumati har safar harbiy maxfiy ma’lumotlar xorijiy serverlarga chiqib ketish xavfi sabab bunga rad javobini bergan.
Shu orada, 5-avgust kuni Inchonda bo‘lib o‘tgan APEC Global raqamli va sun’iy intellekt forumida “Google Korea” direktori Kim Kyong Xun xarita xavfsziligi masalalari bo‘yicha savollarga javob berishdan bosh tortgan.
Ayni vaqtda, Janubiy Koreya hukumati sobiq prezident qarorgohi — Chong Va De (Ko‘k uy)ni milliy xavfsizlik obyektiga aylantirib, jamoatchilik uchun yopganiga qaramasdan, Google Maps’da ushbu hududning asosiy binolari, darvozasi, mehmon uyi va boshqa detallar ochiq ko‘rsatilmoqda.
Aksincha, Naver Map va Kakao Map kabi mahalliy xarita xizmatlari mazkur obyektning ko‘pchilik qismlarini, jumladan kirish joylari va yozuvlarini xiralashtirib qo‘ygan. Tmap esa hatto obyekt atrofidagi sayyohlar uchun mo‘ljallangan Sarangchae markazini butunlay xaritadan olib tashlagan. Mazkur masalaga izoh bergan Google Korea rasmiysi shunday dedi:
“Biz hukumat bilan yaqin aloqani davom ettiramiz va bu masalaga tezda yechim topish uchun mas’ul xodim tayinlash, maxsus aloqa tarmog‘ini ochish hamda maxfiylashtirish mexanizmlarini joriy etishni rejalashtiryapmiz”.
Izoh (0)