Prezident sovg‘asi sifatida berilgan Tahoe avtomobilini shahar hududida soatiga 110 km tezlikda boshqargan Asadxo‘ja Mo‘ydinxo‘jayev jarimaga tortildi. Bu haqda Toshkent shahar IIBB Yo‘l harakati xavsizligi boshqarmasi xabar berdi.
Ma’lum qilinishicha, Ma’muriy javobgarlik to‘g‘risidagi kodeksning 128-3-moddasi 3-qismiga (transport vositalari haydovchilarining belgilangan harakat tezligini oshirib yuborishi) muvofiq ma’muriy bayonnoma rasmiylashtirilib u bilan bilan profilaktik suhbat olib borildi.
Ushbu moddaga ko‘ra, transport vositalari haydovchilarining belgilangan harakat tezligini soatiga 20 kilometrdan ortiq, lekin 40 kilometrdan ko‘p bo‘lmagan kattalikda oshirib yuborishi BHMning besh baravari miqdorida (3 million 60 ming so‘m) jarima solishga sabab bo‘ladi.
Bokschi Asadxo‘ja Mo‘ydinxo‘jayev Prezident sovg‘asi sifatida berilgan avtomobilda Toshkent ko‘chalarida 110 km/soat tezlikda harakatlanib, videoni ijtimoiy tarmoqqa joylagandi.
Asadxo‘ja Mo‘ydinxo‘jayev Fransiyaning Parij shahrida yozgi Olimpiada bahslarida boks musobaqalarida g‘olib bo‘lib, oltin medalni qo‘lga kiritgandi. Oltin medal sohiblariga prezident sovg‘asi sifatida 200 ming AQSH dollari, ikki qavatli kottedj bilan birga Tahoe avtomobili sovg‘a qilingan.
Izoh (0)