Eron rasmiylari 20-avgust kuni Isroil bilan ehtimoliy urush yuzaga keladigan bo‘lsa, yanada kuchliroq raketalar bilan javob berishga tayyorligini aytib, tahdid qildi. Bu haqda Al Arabiya xabar berdi.
Eron mudofaa vaziri Aziz Nasirzoda mamlakatda ancha kuchliroq va zamonaviy texnikalar borligini bildirib, shunday dedi:
“12 kunlik urushda qo‘llanilgan raketalar bir necha yil avval ishlab chiqarilgan edi. Bugungi kunda esa bizda ular bilan solishtirganda ancha kuchliroq imkoniyatlarga ega zamonaviy raketalar mavjud. Agar sionistik dushman yana tajovuz qilsa, biz ushbu raketalardan albatta foydalanamiz”.
Ma’lumot o‘rnida, iyun oyi o‘rtalarida Isroil Eronga qarshi turli texnikalar, xususan raketalar bilan hujum uyushtirishni boshlagan. Bunga Tehron ballistik raketa va dronlar bilan javob qaytargan. Urush davomida yahudiy davlati zarbalari oqibatida eronlik yuqori martabali harbiylar, yadroviy olimlar hamda yuzlab tinch aholi vakillari halok bo‘lgan. AQSH esa qisqa muddatga urushga qo‘shilib, Eron yadroviy obyektlariga zarba bergan.
24-iyundan beri ikki davlat o‘rtasida o‘t ochishni to‘xtatish kelishuvi amalda. Biroq Eron rasmiylari har qanday vaqtda to‘qnashuv qayta boshlanishi mumkinligini ta’kidlamoqda. Eron birinchi vitse-prezidenti Muhammad Rezo Aref 18-avgust kuni bu borada bayonot berdi:
“Eron har lahzada qarshilik ko‘rsatishga tayyor turishi kerak. Bu aslida sulh emas — biz faqat harakatlarni vaqtincha to‘xtatganmiz”.
Shuningdek, Eron armiyasi 21-avgust, payshanba kunidan ikki kunlik harbiy mashg‘ulotlarni boshlashi rejalashtirilgan. Mashg‘ulotlar davomida qisqa va o‘rta masofali qanotli raketalar sinovdan o‘tkaziladi. Ayni paytda, g‘arb davlatlari, xususan Fransiya, Eronning raketa dasturini mintaqaviy xavfsizlikka tahdid deb baholab, Tehrondan nafaqat yadroviy, balki harbiy dasturlar ustidan ham muzokara o‘tkazishni talab qilmoqda. Eron esa o‘zining mudofaa salohiyati muhokama mavzusi emasligini ta’kidlamoqda.
Izoh (0)