Ispaniyaning Guardamar del Segura shahridagi plyajlar suvda noyob va zaharli dengiz jonzotlari — shilliqqurt topilgach vaqtincha yopildi. Bu haqda mahalliy nashrlarga tayanib, CNN xabar berdi.
Guardamar politsiya boshqarmasi 20-avgust kuni ijtimoiy tarmoqqa shunday xabar joylagan:
“Glaucus atlanticus (xalq orasida ‘moviy ajdaho’ deb ataladi) paydo bo‘lgani uchun fuqarolar xavfsizligini ta’minlash maqsadida shahar plyajlarida suzish taqiqlanadi. Yangi ko‘rsatmaga qadar barcha plyajlar yopiladi”.
Moviy ajdaho nomi jonzotning afsonaviy mavjudotlarga o‘xshash ko‘rinishidan kelib chiqqan. Atigi 3 santimetr uzunlikdagi bu mayda dengiz hayvoni o‘zi kabi zaharli hayvonlarni yeb, ularning zaharini o‘zida jamlaydi va keyinchalik undan foydalangan holda o‘zidan 300 barobar katta o‘ljasini falaj holatga keltira oladi. Politsiyaning ogohlantirishicha, bu shilliqqurt bilan kontaktda bo‘lish terida kuchli kuyishlarga olib kelishi mumkin.
“Sayyohlar va mahalliy aholi juda ehtiyotkor bo‘lishi, qum ustida bu jonzotga o‘xshagan narsalarni ko‘rsa, qo‘li bilan tegmasligi lozim”, deyiladi xabarda.
Plyajlardagi bu cheklovlar bir necha kun ichida bekor qilingan va suzishga ruxsat etilgan. Biroq hokimiyat hanuz ehtiyot choralariga amal qilishni tavsiya qilmoqda. Shahar meri Xose Luis Saes jonzotni ko‘rgan fuqarolarni darhol mahalliy rasmiylarga xabar berishga chaqirmoqda:
“Unga hatto qo‘lqop bilan ham tegmang. Agar u kimnidir chaqib olsa, ta’sirlangan joyni sho‘r suv bilan yuvish va tibbiy yordamga murojaat qilish tavsiya etiladi”.
Alikante provinsiyasining quyoshli iqlimi, qoyali sohillari va son-sanoqsiz plyajlari Ispaniyaning eng mashhur sayyohlik yo‘nalishlaridan biri hisoblanadi. Qayd etilishicha, moviy ajdaho odatda Atlantika, Tinch va Hind okeanlarining iliq hamda tropik suvlari orqali oqim va shamol ta’sirida harakatlanadi. Ularni O‘rta Yer dengizida uchratish juda kam holat sanaladi.
Izoh (0)