O‘nga yaqin davlat Ukrainaga qo‘shinlarini yuborishni rejalashtirmoqda. Bu haqda anonim manbalarga tayanib, Bloomberg xabar berdi.
Yevropa yetakchilari 19-avgust kuni bo‘lib o‘tgan onlayn uchrashuvda Ukrainadagi urush tugagach qo‘shin yuborishni muhokama qilgan. Xususan, tinchlik kelishuvi doirasida Britaniya va Fransiya harbiylarini yuborishni ko‘rib chiqmoqda. Qo‘shinlarning soni va joylashuviga aniqlik kiritilmagan.
Rejaning birinchi bosqichi ukrainalik harbiylarni o‘qitish va shaxsiy tarkibni to‘ldirishni nazarda tutadi. Bu orqali Ukraina Qurolli kuchlarini mustahkamlash rejalashtirilgan.
Bu bilan “asosan yevropalik harbiylardan iborat ko‘p millatli guruh”, jumladan, front chizig‘idan uzoqqa joylashtiriladigan Buyuk Britaniya va Fransiyaning “yuzlab” askarlari shug‘ullanadi, deyiladi xabarda.
Rejaning yana bir qismi AQSH tomonidan razvedka ma’lumotlarini almashish, chegaralarni kuzatish, qurol-yarog‘ va havo hujumidan mudofaa vositalarini yetkazib berishni o‘z ichiga oladi.
Xavfsizlik kafolatlari yaqin kunlarda kelishib olinadi
Qo‘shin yubormoqchi bo‘lgan “ko‘ngillilar koalitsiyasi” yaqin kunlarda amerikalik hamkasblari bilan uchrashib, “ishonchli xavfsizlik kafolatlarini va janglar to‘xtatilgan taqdirda qo‘llab-quvvatlovchi kuchlarni joylashtirishga tayyorgarlik” masalasini muhokama qiladi.
Bloomberg manbalari xabar berishicha, ushbu muzokaralarda NATOning Yevropadagi bosh qo‘mondoni general-leytenant Aleksus Grinkevich, alyansga a’zo mamlakatlarning mudofaa shtablari boshliqlari ishtirok etadi. AQSH prezidenti Donald Tramp xavfsizlik kafolatlari doirasida Ukrainaga qo‘shinlar yuborishni “mutlaqo istisno etgan”.
Izoh (0)