Astronomlar osmonda bir vaqtning o‘zida oltita sayyorani qanday kuzatish mumkinligini aytib berdi

Kelasi hafta davomida erta tongda bir chiziqda joylashgan oltita sayyorani ko‘rish imkoniyati tug‘iladi. Bu haqda Associated Press (AP) xabar berdi.

Mutaxassislarning ta’kidlashicha, sayyoralar yulduzlardan farqli o‘laroq, deyarli miltillamaydigan yorqin nuqtalar kabi ko‘rinadi. Kuzatish uchun ochiq osmonli tong va baland binolardan uzoqroq joy qulay hisoblanadi.

Astronomlar Venera, Yupiter, Saturn va xira yorug‘likdagi Merkuriyni oddiy ko‘z bilan ko‘rish mumkinligini, Uran va Neptunni ko‘rish uchun esa durbin yoki teleskop zarurligini aytishmoqda. Eng yaxshi ko‘rinish tong yorishidan sal oldin kuzatiladi: osmonning sharqiy qismida Yupiter va Venera yonma-yon porlaydi. Biroz yuqoriroqda va chetroqda Saturn joylashadi, Merkuriy esa ufqqa yaqin pastda ko‘rinadi.

Seshanba tongiga alohida e’tibor qaratish lozim. Shu kuni Merkuriy Quyoshdan eng katta burchak masofasiga yetadi va oy oxirida quyosh nurida ko‘rinmay qolishidan oldin uni ilg‘ash osonroq bo‘ladi. Shundan so‘ng “parad”ga Oyning ingichka o‘rog‘i qo‘shiladi.

Ushbu hodisani o‘tkazib yubormaslik uchun ochiq osmonli tongni va ko‘rinishni to‘sib qo‘yadigan baland binolar yoki daraxtlar bo‘lmagan ochiq maydonni tanlash muhimdir.

Sayyoralarning keyingi to‘liq tarkibdagi “yig‘ilishi” fevral oyida kutilmoqda, ammo avgust tongi bu yil bir vaqtning o‘zida oltita osmon jismini ko‘rish uchun so‘nggi imkoniyat hisoblanadi.

Bundan avval Magnit bo‘ronlarining Yerga ta’siri kuchayib borayotgani, Quyoshda yirik toj teshigi paydo bo‘lib, kattalasha boshlagani  ma’lum qilingandi.