Isroil armiyasi 31-iyul kuni G‘azo sektorining shimoliy qismidan o‘zining elita qo‘shini bo‘lmish 98-diviziyasini (“olov diviziya” deb ham tanilgan) olib chiqib ketdi. Bu harakat Isroilning hududda olib borayotgan harbiy yurishi nihoyasiga yetayotganidan dalolat berishi mumkin. Bu haqda Anadolu xabar berdi.
“Olov diviziyasi” nomi bilan tanilgan 98-diviziya desantchilar va qo‘mondonlarning elita bo‘linmasidir. U 2023-yil 7-oktyabrda Isroilning G‘azoga qarshi urushi boshlanganidan beri bir necha bor sektorga joylashtirilib, olib tashlangan.
Isroil armiyasi bayonotida bo‘linma sektorda o‘z vazifasini yakunlab, yangi topshiriqqa tayyorgarlik ko‘rayotgani aytilgan.
“Operatsion reja va muddatga muvofiq, 98-diviziya G‘azo shimolida, ayniqsa Shijaiya va Zaytun tumanlarida olib borilgan keskin janglardan so‘ng o‘z vazifasini yakunladi va hozirda yangi topshiriqlarga tayyorgarlik ko‘rmoqda”.
Ushbu diviziya o‘rniga yangi kuchlar yuborilishi haqida ma’lumot berilmagan. Isroilning “Yediot Axronot” nashri bu harakatni harbiy yurish yakuniga yetayotganining belgisi sifatida baholamoqda. Yahudiy davlatining G‘azo sektoridagi urushi hamon jiddiy tanqid ostida bo‘lib, Isroil HAMASni tor-mor eta olmasdan, qo‘yilgan asosiy maqsadlariga erisha olmagani ta’kidlanmoqda.
Isroil 2023-yil 7-oktyabrdan beri G‘azoga qarshi harbiy amaliyotlarni uyushtirib keladi. Hujumlar oqibatida hozirgacha 60 mingdan ortiq falastinlik halok bo‘lgan. Sektorning vayronaga aylanishi va oziq-ovqat taqchilligi sabab ocharchilik yuzaga kelgani xalqaro hamjamiyatning jiddiy xavotiriga sabab bo‘lmoqda.
Joriy hafta boshida Isroilning B’Tselem va “Isroil shifokorlari – inson huquqlari uchun” tashkilotlari yahudiy davlatini G‘azoda genotsid sodir etayotganlikda ayblagandi. Ularning fikricha, bu — falastin jamiyatining izchil yo‘q qilinishi va sog‘liqni saqlash tizimining ataylab buzilishi orqali amalga oshirilmoqda.
2024-yil noyabr oyida Xalqaro jinoiy sud Isroil bosh vaziri Benyamin Netanyaxu va sobiq mudofaa vaziri Yoav Gallantga qarshi G‘azoga va insoniyatga qarshi spdir etilgan jinoyatlar bo‘yicha hibsga olish orderini chiqargan edi. Bundan tashqari, Isroil Xalqaro sudda genotsid ishi bo‘yicha javobgar sifatida ham ko‘rilmoqda.
Izoh (0)