Amerikalik milliarder Ilon Mask o‘z partiyasini tuzish rejalarini vaqtincha to‘xtatdi. Bu haqda manbalarga tayanib, The Wall Street Journal xabar berdi.
Maskning hamkorlariga ko‘ra, milliarder o‘z e’tiborini kompaniyalariga qaratmoqchi. U respublikachilar partiyasidan ovozlarni olib qo‘yishi mumkin bo‘lgan uchinchi partiyani tuzib, “ta’sirchan respublikachilarni” norozi qilishni istamaydi.
Mask 20-avgust kuni X ijtimoiy tarmog‘ida: “WSJ yozganlarning hech birini haqiqat deb qabul qilmaslik kerak, deya izoh qoldirgan.
U so‘nggi paytlarda AQSH senatori Jey Di Vens bilan ko‘p muloqot qilmoqda va agar Vens 2028-yilda prezidentlikka nomzodini qo‘ysa, uni qo‘llab-quvvatlash uchun moliyaviy resurslaridan foydalanishi mumkin. Shunga qaramay, Mask yangi partiya tuzish imkoniyatini rasman rad etmagan. Tarixan uchinchi partiyalar ko‘pincha ikki asosiy partiyaning ovozlarini qo‘lga kiritib kelgan.
Nega Mask partiya tuzishni o‘yladi?
Donald Trampning ikkinchi prezidentlik muddati boshida Mask tashabbusi bilan Hukumat samaradorligi departamenti (DOGE) tuzilgan edi. Biroq may oxirida milliarder vakolatlari tugagani uchun davlat lavozimini tark etdi.
Iyun oyida Mask Trampning “katta go‘zal qonun” loyihasini keskin tanqid qilib, u byudjet defitsitini yanada oshirishini aytdi. Shuningdek, keyingi saylovlarda demokratlarni qo‘llab-quvvatlashi mumkinligini bildirdi. Bunga javoban Tramp unga “juda jiddiy muammolar” bo‘lishini aytdi, ammo Mask keyinchalik yarashuv bilan chiqdi.
Mojaro 1-iyulda yana keskinlashdi. Xususan, Tramp Tesla va Maskning boshqa kompaniyalariga ajratilgan subsidiyalarni tekshirish bilan tahdid qildi.
4-iyul kuni, AQSH Mustaqillik kuni, Mask X tarmog‘ida “Amerika partiyasini tuzishimiz kerakmi?” degan so‘rovnoma o‘tkazdi. Unga bir sutkada 1,3 milliondan ortiq kishi ovoz berdi. Ularning 65 foizi “ikki partiyaviy tizimdan mustaqillik” g‘oyasini qo‘llab-quvvatladi.
“2 ga 1 nisbat: siz yangi siyosiy partiya xohlaysiz — va siz uni olasiz! Mamlakatimiz isrofgarchilik va korrupsiya sabab bankrotlik yoqasida turganda, biz demokratiyada emas, bir partiyali tizimda yashayapmiz”, deya natijaga izoh berdi Mask
6-iyul kuni esa AQSH Federal saylov komissiyasiga “Amerika partiyasi”ni ro‘yxatdan o‘tkazish hujjatlari topshirilgani ma’lum bo‘ldi. Biroq ularni aynan Maskning o‘zi topshirganmi, noma’lumligicha qoldi.
Izoh (0)