Yevropa Ittifoqining tashqi siyosat va xavfsizlik masalalari bo‘yicha oliy vakili Kaya Kallas Ukraina hududlarining ruslarga berilishi bo‘yicha har qanday kelishuvni “Rossiyaning tuzog‘i” deb atadi. Bu haqda Anadolu xabar berdi.
Kaya Kallas BBC nashriga bergan intervyusida Rossiya urushni boshlaganini va hozirgacha hech qanday murosaga kelmayotganini ta’kidlagan.
“Bu aynan Rossiya bizni tushirmoqchi bo‘lgan tuzoqdir. Muhokamalarda faqatgina Ukraina nimadan voz kechishi kerakligiga urg‘u berilgan. Rossiyaning esa hech qanday yon berishga tayyor emasligi unutilmoqda. Asl tajovuzkor — Rossiyadir. Putin kulmoqda — u o‘limlarni to‘xtatmayapti, aksincha, ko‘paytirmoqda”, dedi Kallas.
Kallas 15-avgust kuni Alyaskada bo‘lib o‘tgan AQSH prezidenti Donald Tramp va Rossiya rahbari Vladimir Putin uchrashuviga ham munosabat bildirgan. Uning fikricha, Putin bu uchrashuvda o‘zi xohlaganini olgan va bu uning tinchlik muzokaralariga qiziqishini pasaytirishi mumkin.
“Putin kutganidek iliq kutib olindi, sanksiyalar masalasida ham yengillik oldi. U shunchaki kulmoqda”, dedi YI rasmiysi.
Tramp Zelenskiy va Yevropa yetakchilari bilan ham uchrashdi
AQSH prezidenti Donald Tramp 18-avgust kuni Oq uyda Ukraina prezidenti Vladimir Zelenskiy hamda bir qator Yevropa davlatlari yetakchilari bilan uchrashgan. Unda NATO bosh kotibi Mark Ryutte, Yevrokomissiya rahbari Ursula fon der Lyayen, Fransiya prezidenti Emmanuel Makron, Britaniya bosh vaziri Kir Starmer, Finlyandiya prezidenti Aleksandr Stab, Italiya bosh vaziri Jorja Meloni va Germaniya kansleri Fridrix Mers ishtirok etgan. Eslatib o‘tamiz, Tramp va Putin o‘rtasidagi uchrashuv yakunida hech qanday yakuniy kelishuvga erishilmaganini AQSH prezidenti rasman e’lon qilgan.
Izoh (0)