O‘zbekiston va Germaniya o‘rtasida mehnat migratsiyasi soddalashtiriladi

O‘zbekiston va Germaniya o‘rtasida mehnat faoliyatini amalga oshirish maqsadida vaqtincha migratsiya rag‘batlantiriladi va soddalashtiriladi. Bu haqda Kambag‘allikni qisqartirish va bandlik vazirligi xabar berdi.

Samarqandda o‘tgan O‘zbekiston—Germaniya oliy darajadagi muzokaralari natijasida bir qator hujjatlar imzolangandi. Ular orasida “Migratsiya va mobillik sohasida har tomonlama sheriklik to‘g‘risida” hukumatlararo bitim ham bor.

Vazirlik matbuot xizmatining ma’lum qilishicha, mazkur bitim 25 ta moddadan iborat bo‘lib, tomonlar o‘rtasida quyidagi sohalarda hamkorlik o‘rnatish va rivojlantirishni ko‘zda tutadi:

• ikki davlat hududida mehnat faoliyatini amalga oshirishni maqsad qilgan malakali mutaxassislar, shu jumladan, talabalar va kasbiy ta’lim olayotgan shaxslar hamda jurnalistlar va olimlarning adolatli mobilligini rag‘batlantirish;
• mehnat faoliyatini amalga oshirish maqsadida vaqtincha migratsiyani rag‘batlantirish va soddalashtirish;
• kasbiy ta’lim va malaka oshirish sababiga ko‘ra, hamda mehnat faoliyatini amalga oshirish maqsadida davlatda uzoq muddat bo‘lishni rag‘batlantirish;
• noqonuniy migratsiya va migrantlarni noqonuniy olib kirishning oldini olish va ularga qarshi kurashish;
• mehnat ekspluatatsiyasi, majburiy mehnat va odam savdosi oldini olish va ularga qarshi kurashish hamda jabrlanuvchilarni himoya qilish;
• ikki davlat hududida yashash yoki kirish shartlarini bajarmagan fuqarolarni qaytarishni soddalashtirish.

DPA axborot agentligi ma’lumotlarida keltirilishicha, Germaniyada 13 ming 700 nafar o‘zbekistonlik bo‘lib, ularning mutlaq katta qismi qonuniy asoslarda yashamoqda. 200 nafarga yaqin shaxs O‘zbekistonga deportatsiya qilinishi kutilmoqda.

Samarqand shahrida o‘tgan samarali muzokaralar yakunida Shavkat Mirziyoyev va Germaniya kansleri Olaf Shols Qo‘shma deklaratsiyani qabul qildi. Rasmiy tashrif doirasida 8 ta ikki tomonlama hujjat imzolandi. Bundan tashqari, 2024—2026-yillarga mo‘ljallangan Texnologik sheriklik va sanoat kooperatsiyasi dasturi qabul qilindi, shuningdek, O‘zbekiston va Germaniyaning yetakchi korxonalari darajasida bir qator bitim va shartnomalar tuzildi.