Trampni o‘ldirish bilan tahdid qilgan 22 yoshli yigit ushlandi

AQSHning Pensilvaniya shtatida 22 yoshli Jeykob Bakli prezident Donald Trampni o‘ldirish bilan tahdid qilganlikda ayblandi. Bu haqda Centre Daily Times xabar berdi.

Ayblovga yigitning TikTok ijtimoiy tarmog‘ida yozgan postlari sabab bo‘ldi. U 2025-yil 16-yanvar kuni, Tramp hali saylangan prezident maqomida bo‘lgan paytda, unga va uning tarafdorlariga qarshi tahdidli postlar joylashtirgan.

“MAGA’dan bo‘lgan respublikachilardan nafratlanaman, xudo haqi, ularning hammasini o‘ldiraman”, “Men Trampni o‘ldirmoqchiman”, “To‘rt kundan keyin bizda haqiqiy oligarxiya bo‘ladi, va men Trampni o‘ldiraman”, degan postlar yozgan ayblanuvchi.

Ma’lumot uchun, Donald Tramp 20-yanvar kuni AQSHning 47-prezidenti sifatida qasamyod qabul qilgan. Yigit aybdor deb topilgan taqdirda maksimal besh yilga qamalishi mumkin. Qamoqdan so‘ng unga nazorat ostida bo‘lish muddati, jarima va maxsus to‘lov belgilanishi kutilmoqda. Tergovni AQSH Maxfiy xizmati olib bormoqda.

MAGA — bu “Make America Great Again” (Amerikani yana buyuk qilay) degan shiorning qisqartmasi bo‘lib, Trampning siyosiy kampaniyasida keng qo‘llangan.