Oliy Majlis Qonunchilik palatasining 2025-yil 14-yanvardagi majlisida avtobus uchun ajratilgan yo‘laklarda boshqa transport vositalari harakatlangani uchun javobgarlik ko‘zda tutilgan qonun loyihasi ikkinchi o‘qishda qabul qilindi.
“O‘zbekiston Respublikasining Ma’muriy javobgarlik to‘g‘risidagi kodeksiga jamoat transportidan foydalanish samaradorligini oshirishga qaratilgan qo‘shimcha va o‘zgartirishlar kiritish haqida”gi qonun loyihasi bilan Ma’muriy javobgarlik to‘g‘risidagi kodeksiga transport vositalari haydovchilarining yo‘nalishli transport vositalari uchun alohida ajratilgan tasmasi bor yo‘ldan harakatlangani uchun javobgarlik belgilanmoqda. Xususan, kodeks 128-7-moddasi bilan to‘ldirilmoqda.
Bunda quyidagi holatlar uchun javobgarlik belgilanmaydi:
- alohida ajratilgan tasmasi bor yo‘ldan tezkor va maxsus xizmatlarning transport vositalarining harakatlangani;
- yondosh hududning kirish yoki chiqish joyidan 50 metr masofada uzuq-uzuq chiziqli joygacha yoxud yaqin masofadagi uzuq-uzuq chiziqli joygacha harakatlanganlik;
- yo‘nalishli transport vositalari harakatiga xalaqit bermaslik sharti bilan yo‘lga chiqish;
- qatnov qismining chetki o‘ng tomonida yo‘lovchilarni chiqarish va tushirish uchun harakatlanganlik.
Majlisda so‘zga chiqqan Korrupsiyaga qarshi kurashish va sud-huquq masalalari qo‘mitasi a’zosi Ulug‘bek Qobulovning mazkur qonun loyihasi Prezident administratsiyasining 2024-yilning sentyabr oyidagi topshirig‘i ijrosini ta’minlash uchun IIV tomonidan ishlab chiqilganini qayd etdi. Qonun loyihasi 2024-yilning 11-dekabrida birinchi o‘qishda ko‘rib chiqilib, qabul qilingandi. Uni ikkinchi o‘qishga tayyorlashda yanada takomillashtirilib, maromiga yetkazildi.
Ulug‘bek Qobulovning so‘zlariga ko‘ra, ma’muriy jarima miqdorini belgilashda bir qator xorijiy davlatlar tajribasi o‘rganildi. Xususan, AQSHning Nyu York shtatida bunday huquqbuzarlik uchun 50−250 dollar, Fransiyada — 35−135 yevro, Germaniyada — 135 yevrogacha, Belarusda — 12 dollar (takror sodir etilganda — 25 dollargacha), Qozog‘istonda 7 dollar (takror sodir etilganda — 70 dollargacha) miqdorida jarima undirilishi aniqlangan.
“Yuqoridagilarni hisobga olib, tashabbuskor mas’ul xodimlar bilan taklif etilgan moddaning sanksiyasi miqdorini tushirishga qaror qildik”, dedi deputat, biroq uning miqdorlariga aniqlik kiritmadi.
Dastlab qoidabuzarlikni birinchi marta sodir etganlik uchun BHMning 3 baravari (1 mln 125 ming so‘m), takror sodir etganlik uchun BHMning 5 baravari (1 mln 875 ming so‘m) miqdorida jarima belgilash taklif etilgandi.
Izoh (0)