Samarqand viloyati IIB Nurobod tumanida sodir bo‘lgan yo‘l-transport hodisasi yuzasidan ma’lumot berdi.
Qayd etilishicha, 4-iyun kuni soat 16:30 larda Nurobod tumani “Mehnatkash” mahallasi hududidan o‘tuvchi Samarqand—G‘uzor A-378 avtomobil yo‘lining 35-kilometrida 25 yoshli P.Y. o‘zining boshqaruvida bo‘lgan KamAZ-53212 rusumli yuk avtomashinasida harakatlanib borishi davomida piyodalar o‘tish yo‘lakchasidan o‘tayotgan J.F. va uning ikki nafar voyaga yetmagan farzandini urib yuborib yo‘l-transport hodisasini sodir qilgan.
Natijada ikki nafar voyaga yetmagan bola olgan tan jarohatlari bilan voqea joyida vafot etgan. Ularning onasi Samarqand tumani markaziy shifoxonasiga yotqizilgan.
Mazkur holat yuzasidan shu kuni Samarqand viloyati IIB huzuridagi Tergov boshqarmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 3-qismi “a” bandi bilan jinoyat ishi qo‘zg‘atilib, haydovchi jinoyat ishida gumon qilinuvchi tariqasida ishda ishtirok etishga jalb qilinib, Jinoyat-protsessula kodeksining 227-moddasi tartibida ushlangan. Hozirda tergov harakatlari olib borilmoqda.
Avvalroq Andijon viloyatining Paxtaobod tumanida yo‘lni kesib o‘tayotgan piyodani Lacetti urib ketgani, Toshkentda sodir bo‘lgan YTH oqibatida piyoda vafot etgani to‘g‘risida xabar berilgandi.
Izoh (0)