Toshkent shahrida Majburiy ijro byurosi xodimlari jarimalarni o‘z vaqtida to‘lamagan qarzdorning Tesla’sini xatladi. Bu haqda “Daryo”ga MIB matbuot xizmati xabar berdi.
Qayd etilishicha, MIBning Shayxontohur tuman bo‘limi ish yurituvida IIBB Yo‘l harakati xavfsizligi boshqarmasining qarorlariga asosan qarzdor F.Sh.dan 186 ta ijro hujjatlari bo‘yicha jami 116 million so‘mdan ortiq miqdordagi maʼmuriy jarima undirish to‘g‘risidagi ijro hujjatlari mavjud.
Mazkur ijro hujjatlari byuroning Shayxontohur tuman bo‘limi ish yurituviga 2023-yilning iyun oyidan boshlab hozirgi kunga qadar jami 186 ta ijro hujjatlari kelib tushgan bo‘lsa-da, qarzdor tomonidan ixtiyoriy ravishda bartaraf qilinmagan.
Qarzdorliklar bartaraf qilinmagach, byuro tomonidan 18-may kuni qarzdorga tegishli Tesla Model 3 rusumli avtotransport vositasiga qidiruv eʼlon qilingan.
Olib borilgan tezkor tadbirlar davomida qidiruvda bo‘lgan Tesla qarzdorning xonadonidan topilib, qarzdor fuqaroga avtotransport vositasini xatlab, vaqtincha saqlash uchun jarima maydoniga qo‘yilishi bildirilganda, qarzdor avval faol qarshilik ko‘rsatib, davlat ijrochisining qonuniy talabiga bo‘ysunmagan bo‘lsa, keyinchalik masʼul xodimlar tomonidan holatning huquqiy oqibati tushuntirilganidan so‘ng qarzdor tomonidan mashina ixtiyoriy ravishda topshirilgan.
Hozirgi kunda avtotransport vositasini realizatsiya qilish choralari ko‘rilmoqda.
Avvalroq Toshkent viloyati Ohangaron tumanida bankdan qariyb 420 million so‘m qarzi bor fuqaroning mashinasi xatlangani, Toshkent viloyatida MIB tomonidan “svet”dan 22,6 mlrd so‘m qarzdorlik undirilgani, Toshkentda qarzdor tashkilotning Malibu’si auksionda sotib yuborilgani to‘g‘risida xabar berilgandi.
Izoh (0)