Ijtimoiy tarmoqlarda Jizzax viloyatining Zomin tumanida sel hodisalari kuzatilayotgani aks etgan videolar tarqaldi. FVV matbuot xizmati holat yuzasidan izoh berdi.
Maʼlum qilinishicha, 27-may kuni soat 12:50 larda Jizzax viloyati, Zomin tumani, “Duoba” MFYning yuqori tog‘ va adirliklarida kuzatilgan jala yomg‘ir natijasida sel oqimlari yuzaga kelgan.
Ushbu sel oqimlari soy o‘zaniga sig‘may mahalla hududidan o‘tgan avtomobil yo‘lining bir qismiga loyqa va turli jinslarni oqizib kelib, to‘sib qo‘ygan. Oqibatda ushbu avtomobil yo‘lida transport vositalarining qatnovi vaqtinchalik to‘xtatilgan.
Zudlik bilan hodisa joyiga masʼul tashkilotlar kuch va vositalari yetib borib, muhandislik texnikalari yordamida sel oqimi oqibatlarini bartaraf etish ishlari olib borilmoqda.
Hodisa natijasida fuqarolar, aholi yashash xonadonlari, ijtimoiy soha obyektlari va chorva mollariga zarar yetmagan.
Hozirda qisman avtomobillar harakati yo‘lga qo‘yilgan.
Avvalroq O‘zbekistonning 9 viloyatiga 28-maydan 2-iyungacha sel kelishi mumkinligi haqida xabar berilgandi.
Izoh (0)