Ижтимоий тармоқларда Жиззах вилоятининг Зомин туманида сел ҳодисалари кузатилаётгани акс этган видеолар тарқалди. ФВВ матбуот хизмати ҳолат юзасидан изоҳ берди.
Маълум қилинишича, 27 май куни соат 12:50 ларда Жиззах вилояти, Зомин тумани, “Дуоба” МФЙнинг юқори тоғ ва адирликларида кузатилган жала ёмғир натижасида сел оқимлари юзага келган.
Ушбу сел оқимлари сой ўзанига сиғмай маҳалла ҳудудидан ўтган автомобиль йўлининг бир қисмига лойқа ва турли жинсларни оқизиб келиб, тўсиб қўйган. Оқибатда ушбу автомобиль йўлида транспорт воситаларининг қатнови вақтинчалик тўхтатилган.
Зудлик билан ҳодиса жойига масъул ташкилотлар куч ва воситалари етиб бориб, муҳандислик техникалари ёрдамида сел оқими оқибатларини бартараф этиш ишлари олиб борилмоқда.
Ҳодиса натижасида фуқаролар, аҳоли яшаш хонадонлари, ижтимоий соҳа объектлари ва чорва молларига зарар етмаган.
Ҳозирда қисман автомобиллар ҳаракати йўлга қўйилган.
Аввалроқ Ўзбекистоннинг 9 вилоятига 28 майдан 2 июнгача сел келиши мумкинлиги ҳақида хабар берилганди.
Изоҳ (0)