Oliy Majlis Qonunchilik palatasining 3-iyundagi yig‘ilishida deputat, “Milliy taklanish” demokratik partiyasi raisi Alisher Qodirov bog‘cha va maktablardagi ayrim kamchiliklar to‘g‘risida fikr bildirdi. Uning aytishicha, davlat byudjetidan taʼlim-tarbiya sohasiga ajratilayotgan mablag‘lar to‘liq samara bermayapti.
Alisher Qodirov parlamentdagi nutqida davlat byudjetidan taʼlim-tarbiya sohasiga ajratilayotgan mablag‘lar samaradorligiga alohida eʼtibor qaratish zarurligi haqida gapirdi. Deputat so‘zini bog‘chalarga yetarli eʼtibor qaratilmayotganidan boshladi.
“Mamlakatda 34 mingtaga yaqin bog‘chalar qurildi. Bu oson bo‘layotgani yo‘q. Qamrov darajasi 70 foizga yaqinlashdi. Lekin takror aytyapmizki, bu ishning ichida mazmun yo‘qolib qolmasligi kerak. Agar bitta tarbiyachiga 30 nafar bola to‘g‘ri kelayotgan bo‘lsa, demak biz bog‘chadagi maqsadimizga erishmayapmiz hisob. Agar bitta bog‘cha tarbiyachisi 1 million so‘m atrofida oylik olayotgan bo‘lsa, bu binolar ichidagi maqsadimizga erishmayapmiz degani. Biz Maktabgacha va maktab taʼlimi vazirligi ushbu masalaga yetarlicha eʼtibor qaratmayapti, deb hisoblayapmiz. To‘g‘ri, maktablarda o‘qituvchilarning oylik-maoshini oshirish va ular uchun sharoitlarni yaxshilash bo‘yicha ko‘p ishlar qilindi. Lekin bog‘chalarga yetarli eʼtibor qaratilmayapti”, — dedi partiya rahbari.
Alisher Qodirovning taʼkidlashicha, maktablarda taʼlim sifati va moddiy-texnik baza masalalarida qator muammolar mavjud.
“Maktab o‘qituvchilarining malakasi bugungi dunyo taʼlim tizimidagi o‘zgarishlar bilan mutanosib ketayotgani yo‘q. Birgina misol, byudjetdan 7 trillion so‘m mablag‘ maktablardagi maʼnan eskirgan kompyuterlarni o‘zgartirish uchun ajratilyapti. Bugun kompyuter texnikasining o‘zi maʼnan eskirib bo‘ldi. Agar maktablarga va taʼlimga raqamlashtirishni kirita olmasak, bugungi raqamlashtirish siyosatiga javob bera oladigan pedagoglarni tayyorlay olmasak, byudjetdan ajratilayotgan mablag‘lardan kutilayotgan samara bo‘lmaydi. Bugun maktablarni elektron doskalarsiz tasavvur qilish mumkin emas. O‘rganishlarimizga ko‘ra, respublikadagi maktablarga elektron doskalar yetishmaydi. Shunday doskalar yetishmayotgan bir vaziyatda maʼnan eskirgan kompyuterlarni yangilashga 7 trillion so‘m mablag‘ ajratilyapti. Bu qanchalik samarali — vazirlik, albatta, o‘zi baho berishi kerak”, —dedi deputat.
Shuningdek, Alisher Qodirov oliy taʼlim muassasalariga sarflanayotgan mablag‘lar samaradorligi yuzasidan ham savollar borligini aytdi.
“Oliy taʼlim sohasidan mablag‘ ayalayotgani yo‘q. Lekin kutilayotgan samaradorlik masalasida muammolar bor. 10 yil avval bir pedagog oylik-maoshi 300 dollarga ham yetmagan bo‘lsa, hozir professor-o‘qituvchilar 3 ming dollarga yaqin oylik olyapti. Lekin qani oliy taʼlim muassasalarida bizning iqtisodiyotimiz uchun tashabbus, qani yangi g‘oyalar, qani ularning iqitisodiyotdagi ishtiroki va malakali mutaxassislari? Bu borada ham ishlatilayotgan mablag‘lar samaradorligi nuqtayi nazaridan o‘zimizning savollarimiz bor. Mazkur masala bo‘yicha o‘z takliflarimizni moliyalashtirishga masʼul bo‘lgan idoralar bilan birga muhokama qilishda davom etamiz”, — dedi Alisher Qodirov.
Avvalroq 2024-yilning yanvar–mart oylarida O‘zbekiston byudjetidan davlatga qarashli bog‘chalarga 3 trillion so‘m, maktablarga 10,4 trillion so‘m, OTMlarga 1,6 trillion so‘m ajratilgani xabar qilingandi.
Izoh (0)