Joriy yil yanvar–mart oylarida O‘zbekiston byudjetidan davlatga qarashli bog‘chalarga 3 trillion so‘m, maktablarga 10,4 trillion so‘m, oliy taʼlim muassasalariga 1,6 trillion so‘m ajratildi. Bu haqda Iqtisodiyot va moliya vazirligi hisobot berdi.
2024-yilning dastlabki uch oyida davlat byudjetidan ijtimoiy soha xarajatlarining asosiy qismi — 16 trillion so‘mini (47,2 foiz) taʼlim tizimi muassasalarini saqlash va rivojlantirish xarajatlari tashkil etgan. Bu mablag‘ 2023-yilning mos davridan qariyb 3 trillion so‘mga ko‘p.
Bog‘chalar xarajatlari
Hozirda O‘zbekistonda 26 ming 315 ta nodavlat, 6 ming 780 ta davlat bog‘chalari mavjud bo‘lib, ularda 2 million 267 ming nafar bolalar tarbiyalanmoqda (jami qamrov 74,3 foiz).
2024-yil I choragida davlat byudjetidan maktabgacha taʼlim tizimiga jami 3 trillion 19 milliard so‘m (2023-yil mos davridagidan 474,8 milliard so‘m ko‘p) mablag‘ ajratildi. Bunda ish haqi va unga tenglashtirilgan to‘lovlari uchun 1 trillion 263 milliard so‘mni, yagona ijtimoiy to‘lovlari uchun 314,5 milliard so‘mni tashkil etdi. Shu bilan birga, davlat-xususiy sheriklik asosida tashkil etilgan bog‘chalarga byudjet subsidiyalari uchun 751 milliard so‘m, oziq-ovqat xarajatlariga 450,2 milliard so‘m, boshqa xarajatlar uchun 241,1 milliard so‘m yo‘naltirilgan.
Maktab va o‘rta maxsus taʼlim xarajatlari
Umumtaʼlim sohasiga yanvar–mart oylarida 10,4 trillion so‘m (2023-yil mos davridagidan 1,8 trillion so‘m ko‘p) mablag‘ ajratildi.
“Bunda, ish haqi va unga tenglashtirilgan to‘lovlar uchun 7,6 trillion so‘m, yagona ijtimoiy to‘lov xarajatlariga 1,9 trillion so‘m mablag‘lar yo‘naltirildi. O‘z navbatida sohaga ajratilayotgan mablag‘larning yildan yilga o‘sib borishiga o‘qituvchilarning mehnatiga haq to‘lash miqdorlarining oshirib borilishi ham o‘z taʼsirini ko‘rsatgan. 2024-yilning 1-choragida kadrlar tayyorlash sohasiga jami 2,6 trillion so‘m yoki 2023-yilning mos davri bilan taqqoslaganda 648,7 milliard so‘mga ko‘p mablag‘ yo‘naltirildi. Ushbu mablag‘larning 1,4 trillion so‘mi ish haqi va ish haqiga ajratmalar uchun sarflangan”,—deyiladi vazirlik hisobotida.
Qayd etilishicha, kadrlar tayyorlash bo‘yicha amalga oshirilgan xarajatlarning 730,3 milliard so‘m qismi (28,3 foiz) o‘rta maxsus va professional taʼlim muassasalarini saqlash hamda ushbu yo‘nalishlarda taʼlim oluvchilarga qulay sharoitlar yaratilishini taʼminlash uchun sarflangan.
O‘rta maxsus va professional taʼlim muassasalarining ish haqi va unga tenglashtirilgan to‘lovlari, ish haqiga ajratmalar uchun 616,3 milliard so‘m hamda boshqa xarajatlar (IV guruh xarajatlari) uchun 114 milliard so‘m mablag‘ ajratilgan.
Oliy taʼlim xarajatlari
Yanvar–mart oylarida mamlakatdagi oliy taʼlim muassasalarini saqlash, malaka oshirish tadbirlarini tashkil etish va boshqa xarajatlar uchun 1,6 trillion so‘m xarajatlar amalga oshirilgan.
Birinchi chorakda Taʼlim kreditini moliyalashtirish jamg‘armasi mablag‘lari hisobidan jami 515,8 milliard so‘m miqdorida 47 ming nafar talabaga ajratilgan imtiyozli taʼlim kreditlari moliyalashtirilib berilgan.
Hisobot davrida yotoqxona bilan taʼminlanmagan va ijarada yashaydigan 57 ming 600 nafar talabaga 132,1 milliard so‘m miqdorida kompensatsiya mablag‘lari to‘lab berilgan.
Eslatib o‘tamiz, 2024-yil uchun davlat byudjeti qonuniga ko‘ra, joriy yilda maktabgacha va maktab taʼlimi tizimiga 46,6 trillion so‘m, oliy taʼlim, fan va innovatsiyalarga 6,1 trillion so‘m ajratilishi ko‘zda tutilgan.
Avvalroq yanvar–mart oylarida O‘zbekiston byudjeti xarajatlari daromadlaridan 17,7 trillion so‘mga ko‘p bo‘lgani xabar qilingandi.
Izoh (0)