Тошкент вилоятининг Янгийўл шаҳрида қурилиш кранининг ўқ қисми боғча томига қулади.
Қурилиш ва уй-жой коммунал хўжалиги вазирлиги матбуот хизматининг маълум қилишича, 25 март куни соат 19:10 лар атрофида “Бахт” МФЙда жойлашган 5-сонли боғча билан қўшни ҳудудда хусусий тадбиркор томонидан қурилаётган турар жой комплексида ўрнатилган кўтарма краннинг ўқ (стрела) қисми ёмғир сабабли қулаган. Оқибатда боғча том қисмига шикаст етган.
-X9Imv4Zb.avif)
Ҳодиса жойига зудлик билан Фавқулодда вазиятлар бўлими, ҳокимият, прокуратура, ИИБ мутасаддилари етиб борган. Бинонинг том қисмини зарарлаган кўтарма кран ўқи олиб ташланиб, вазият тўлиқ назоратга олинган.
Айни кунларда қурилиш ташкилоти томонидан муассаса том қисмида зарар етган профнастил қоплама ва ёғоч қисм олиб ташланиб, таъмирлаш ишлари бошланган. Қурилиш ташкилоти масъуллари 3 кун муддатда боғчанинг зарар етган қисмини таъмирлаб, бинони ишчи ҳолатга келтиришини билдирди.
Тошкент вилояти мактабгача ва мактаб таълими бошқармаси матбуот хизматининг маълум қилишича, бахтсиз ҳодиса оқибатида жароҳат олганлар йўқ. Ҳозирда боғча фаолияти бир муддатга тўхтатилган.
8 март куни Тошкент вилоятининг Янгийўл туманидаги асосий қатнов йўлдаги кўприкнинг бетон тутқичи қулаб тушиб, хавфли вазият юзага келганди.
Изоҳ (0)