Тошкент ҳокимлиги тез орада 2024—2025 йилги иситиш мавсумини якунлаш тўғрисида қарорни қабул қилади, деб хабар берди Veolia Energy.
Ўзбекистон гидрометеорология хизмати маълумотларига кўра, 2025 йилнинг 8 мартдан 14 мартигача бўлган даврда Тошкентда ўртача суткалик ҳарорат 11,6 (минимал — 9 даража 8 мартда, максимал — 13,1 даража 14 мартда) даража бўлди.
Вазирлар Маҳкамасининг “Кўп қаватли уйларда иссиқлик таъминоти хизмати кўрсатиш тартиблари тўғрисида”ги қарорига кўра, ўртача суткалик ҳаво ҳарорати кетма-кет беш кун мобайнида 8 даражада сақланиб турса, иситиш мавсуми якунланади.
Ушбу қарорга асосланиб, Тошкент шаҳри ҳокимлиги тез орада 2024–2025 йиллар учун иситиш мавсумини ёпиш ҳақида қарор қабул қилади, дейилади хабарда.
Маълум қилинишича, иситиш мавсуми якунлангач, кейинги мавсумга тайёргарлик ишлари кўрилади. Йилнинг совуқ мавсумида иссиқлик таъминоти янада барқарор ва сифатли бўлиши учун иссиқлик тармоқлари, маҳаллий қозонхоналар ва насос станцияларида жорий ҳамда капитал таъмирлаш олиб борилади.
Тошкент шаҳрида сўнгги йилларда иситиш мавсумининг бошланиш ва тугаш саналари:
2020/21: 2020 йил 17 октябрдан 2021 йил 7 апрелгача (174 кун);
2021/22: 2021 йил 14 октябрдан 2022 йил 1 апрелгача (170 кун);
2022/23: 2022 йил 24 октябрдан 2023 йил 10 мартгача (138 кун);
2023/24: 2023 йил 8 ноябрдан 2024 йил 26 мартгача (140 кун).
Тошкент шаҳрида 2024—2025 йилги иситиш мавсуми 2024 йил 7 ноябрдан бошланганди.
Изоҳ (0)