Ўзбекистонда фуқароларнинг дебитор қарздорлиги қанчалиги маълум қилинди 

Ўзбекистонда жорий йил I чорак якуни ҳолатига республика бўйича дебитор қарздорлик жами 979,9 миллиард сўмни ташкил этмоқда. 

Бу ҳақда АОКАда ўтказилган брифингда “Ўзсувтаъминот” АЖ ахборот хизмати раҳбари Акмал Муродов маълум қилди. Унга кўра, жорий йилда инвестиция дастури доирасида жами 308,2 миллион доллар миқдордаги маблағлар ўзлаштирилиши ҳисобига 20 та лойиҳани амалга ошириш белгиланган бўлиб, I чорак якуни бўйича 49,8 миллион доллар маблағлар ўзлаштирилиб, белгиланган режа 102,2 фоизга бажарилиши таъминланди.

Шунингдек, инвестиция дастури доирасида 76 та объектда қурилиш-монтаж ишларини бажариш учун ажратилган 909 миллиард сўм маблағдан I чорак якуни ҳолатига 213,1 миллиард сўм ўзлаштирилиб, 170,5 км ичимлик ва 23 км оқова сув тармоқлари ҳамда 14 та ичимлик ва 2 та оқова сув иншоотларида қурилиш-монтаж ишлари амалга оширилди.

2024 йил якунига қадар давлат бюджетидан ажратилган 1 триллион 40 миллиард сўм маблағлар ҳисобига 141 та объектда қурилиш-монтаж ишларини амалга ошириш белгиланган. Жорий йил I чорак якуни бўйича 230,2 миллиард сўм маблағ ўзлаштирилиши ҳисобига 192,9 км ичимлик ва 45,2 км оқова сув тармоқлари ҳамда 14 та ичимлик ва 4 та оқова сув иншоотларида қурилиш-монтаж ишлари бажарилди.

“Ўзсувтаъминот” АЖ ва унинг ҳудудий сув таъминоти корхоналари томонидан 106 та бино ва иншоотларга жами 714,5 кВт ли қуёш панеллари ўрнатилиб, 2024 йил I чорак якунига кўра 351 миллион сўмлик электр энергияси иқтисод қилинишига эришилди.