“Техник хатолик юз берган бўлиши мумкин” — Қашқадарё ҳокимлиги “Меҳр дафтари” ҳисобидан электромобиллар харид қилинаётгани ҳақида

Қашқадарё вилояти ҳокимининг матбуот котиби Аҳрор Содиқов вилоят ҳокимлиги “Меҳр дафтари” жамғармаси ҳисобидан  тўртта BYD Song Plus автомашиналар харид қилаётгани юзасидан тарқалган хабарларга муносабат билдирди.

Унга кўра, мазкур ҳолатда техник хатолик юз берган бўлиши мумкин. Вилоят ҳокимлиги харид қилган гибрид транспорт воситалари президент қарори асосида халқ депутатлари вилоят кенгашининг 2024 йил 16 февралдаги К/24-сонли қарори қабул қилиниб, унга асосан маҳаллий бюджетнинг 2024 йил бошидаги эркин қолдик маблағлари ҳисобидан харид қилинган. Яъни автомобиллар хариди учун “Меҳр дафтари” жамғармасидан маблағ ўтказилмаган.

Қайд этилишича, ушбу автомобиллар Вазирлар Маҳкамасининг 258-сонли “Давлат бошқаруви ва маҳаллий давлат ҳокимияти органларида хизмат автотранспорт воситаларидан фойдаланиш тизимини тубдан такомиллаштириш чора-тадбирлари тўғрисида”ги қарорида белгиланган меъёрлар амал қилган ҳолда харид қилинган.

Ҳозирда серверда нега “Меҳр дафтари” жамғармаси кўрсатилаётгани сабаблари ўрганилмоқда. Қўшимча маълумотлар тақдим этамиз, — дейилади муносабатда.

“Газета.уз” нашрининг ёзишича, Қашқадарё вилояти ҳокимлигининг “Меҳр дафтари” жамғармаси номидан тўртта “гибрид” BYD Song Plus сотиб олиш бўйича 1 миллиард 780 миллион сўмлик келишувлар амалга оширилмоқда (1, 2, 3, 4). Ўтган йилнинг 9 июнь куни ушбу жамғарма томонидан ҳам 450 миллион сўмга Chevrolet Equinox (старт-стоп тизими билан жиҳозланган гибрид) сотиб олиш учун ариза берилган бўлиб, у ҳали ижро босқичида.

Шунингдек, Бухоро вилояти ҳокимлиги матбуот хизмати томонидан ҳам муносабат эълон қилинди. Унда ҳам “Меҳр дафтари” жамғармаси маблағлари электромобиль сотиб олиш учун ишлатилгани рад этилган. Улар давлат харидлари порталида маълумотларнинг нотўғри кўрсатилишини сайтдаги камчилик билан боғлаган ва тез орада камчилик тўғриланишига умид билдирган.

Таъкидланишича, Бухоро вилояти ҳокимининг 14 декабрдаги фармойиши билан Чина Group компаниясидан маҳаллий бюджет заҳира жамғармаси маблағлари ҳисобидан қонуний талаблар асосида 1 дона BYD Song Plus Champion электромобили харид қилинган. Хабарда айтилишича, бунда “Меҳр дафтарчаси” маблағларидан фойдаланилмаган. Ҳокимлик ҳужжатлар нусхаларини илова қилган.

“Давлат харидлари порталида вилоят ҳокимлигининг СТИР (солиқ тўловчининг идентификация рақами) орқали қидирув берилганда ъМеҳр дафтариъ жамғармаси номи остида жойлаштирилгани маълум бўлди, бу электрон порталда техник хатоликлар мавжудлигини кўрсатмоқда”, — дея таъкидланади хабарда. Ҳокимликнинг қўшимча қилишича, вилоятнинг бир қатор шаҳар ва туманлари ҳокимликларининг СТИРни қидиришда ҳам худди шундай камчилик кузатилмоқда.