Қозоғистоннинг Ақтўбе вилоятида рўй берган йўл-транспорт ҳодисаси оқибатида вафот этган 8 нафар Ўзбекистон фуқаросининг жасади Сурхондарё вилоятидаги “Термиз” халқаро аэропортига олиб келинди. Бу ҳақда Фавқулодда вазиятлар вазирлиги хабар берди.
Президент Шавкат Мирзиёевнинг топшириғига асосан, ҳукумат фармойиши билан фавқулодда вазиятлар вазири ўринбосари бошчилигида ташкил этилган махсус комиссия 4 апрель куни Ақтўбе вилоятига етиб борган эди. Махсус комиссия аъзолари Қозоғистоннинг масъул идоралари раҳбарлари билан учрашиб, белгиланган ташкилий ва амалий тадбирларни ҳамкорликда олиб борган. Шундан сўнг Ўзбекистон Мудофаа вазирлигининг махсус бортида йўл-транспорт ҳодисаси оқибатида вафот этган фуқаролар Қозоғистондан 5 апрель куни соат 03:00 ларда Сурхондарё вилоятидаги “Термиз” халқаро аэропортига олиб келинган.
Фавқулодда вазиятлар, Мудофаа, Ички ишлар, Ташқи ишлар, Соғлиқни сақлаш ва Транспорт вазирликлари ҳамкорлигида 8 нафар вафот этган фуқаронинг жасади яшаш манзилларига юборилган. Ҳозирда маҳаллий ҳокимликлар томонидан дафн маросимларини ўтказиш бўйича тайёргарлик ишлари олиб борилмоқда.
Аввалроқ Шавкат Мирзиёев Қозоғистон президенти Қосим-Жўмарт Тўқаевга Ақтўбе вилоятида рўй берган автомобиль ҳалокатида вафот этганларнинг оила аъзолари ва яқинларига айтилган чуқур ҳамдардлик учун самимий миннатдорлик билдирган эди.
Изоҳ (0)