“Итлар ҳужуми содир бўлмаган”. Тошкент шаҳар ҳокимлиги  59 ёшли эркак ўлими сабабини очиқлади

Ижтимоий тармоқларда Тошкент шаҳрида 59 ёшли эркак итлар ҳужумидан сўнг вафот этгани ҳақида хабарлар тарқалди. Пойтахт ҳокимлиги буни рад этди.

Хабарда маълум қилинишича, бугун, 3 март куни, Қорақамиш мавзесининг 2/4-кварталида яшовчи 1966 йилда туғилган эркак вафот этган бўлиб, унинг ўлимига эгасиз итлар ҳужуми эмас, балки ўткир юрак-қон томир етишмовчилиги сабаб бўлган.

“Тарқалаётган миш-мишларнинг аксига ўлароқ, ҳеч қандай итлар ҳужуми содир бўлмаган. Шаҳар аҳолисини ваҳимага тушмасликка ва нотўғри маълумотларни тарқатмасликка чақирамиз”, дейилади матбуот хизмати хабарида.

1 март куни Тошкент шаҳар Мирзо Улуғбек туманида кўп қаватли уйларнинг биридаги хонадонда чақнаш содир бўлгани ортидан 2 киши вафот этганди.