Ижтимоий тармоқларда Тошкент вилояти, Оҳангарон шаҳрида ҳомиладор аёл қорнидаги ҳомиласи билан вафот этгани ҳақида хабарлар тарқалган эди. Марҳуманинг турмуш ўртоғи воқеа ҳақида гапириб берди.
2024 йилнинг 3 апрель куни соат 02:45 да 1992 йил Оҳангарон шаҳрида туғилган Х.А. қорин ва белдаги оғриқ билан Оҳангарон шаҳар тиббиёт бирлашмаси туғуруқ бўлимига “Ҳомиладорлик 4, 39 ҳафта туғуруқ 3. Туғуруқнинг 1 даври, латент фазаси. Семизлик III даража” ташхиси билан қабул қилинган. Бемор шифокорлар назорати остида бўлган.
4 апрель куни соат 14:10 да аёлнинг тўсатдан аҳволи оғирлашиб, ҳаво етишмаслиги ва юрак соҳасида оғриқ билан нафас олиши қийинлашган. Шундан сўнг зудлик билан реаниматолог чақиртирилиб, беморда зарур реанимацион чоралар амалга оширилган.
Бироқ шунга қарамай, 14:35 да аёлда биологик ўлим ҳолати кузатилган.
Суд-тиббий экспертизасининг дастлабки хулосасига кўра, беморнинг ўлимига юрак ишемик касаллиги, ўткир коронар етишмовчилиги, юрак мушакларининг гипертрофияси ва ўткир миокард инфаркти сабаб бўлган.
Асорати: ўткир юрак ва нафас етишмовчилиги. Ўпка ва бош мия шиши.
Ёндош: Ҳомиладорлик 4, туғуруқ 3, ҳомиладорлик 39-40 ҳафта. Бачадон шиллиқ қаватларига қон қуйилиши. Семизлик 3 даража. Спленомегалия. Ўткир жигар гепатози. Бачадонда жинси эркак ҳомила. Ҳомила ичи асфиксияси. Ҳомила антенатал ўлими.
Марҳуманинг эри аёлида ҳеч қандай нуқсон бўлмаганини, шифохонага ҳам ўзи билан бирга борганини айтмоқда.
“2015 йил турмуш қурганмиз, икки фарзандимиз бор. 3-фарзандни режалаштириб, тўлғоқ келганда шифохонага бирга бордик. Ҳаммаси яхши дейишди. Телефонда гаплашганимизда ҳам ўзини яхши ҳис қилаётганини айтди, дори керак, деди. Осма укол қилса тўлғоқ тезлашар экан, деди. Қайнонам телефон қилиб, қизи телефонни кўтармаётганини айтди. Ишонч билан ичкарига кирдим. Врачга аёлимни чақириб беришини илтимос қилдим. Кириб кетиб, эшикни қулфлаб олди. Юрагим жуда тез урди. Ташқарига чиқиб арқондан осилиб хонасига чиқсам, дераза очиқ экан. Кирганимда аёлим сочиғи билан ёпиб қўйилган экан. Ўлмаган деб ўйлаяпман. Туғруқхонадагилар юрагида нуқсони бўлган, дейишди. Аёлимда ҳеч қандай нуқсон бўлмаган. Аёлимга бееътибор бўлганларга чора кўрилишини хоҳлайман”, — дейди марҳуманинг эри.
Бош прокуратура матбуот хизматининг хабар беришича, ҳолат юзасидан прокуратура томонидан терговга қадар текшириш ҳаракатлари олиб борилмоқда.
“Текшириш ҳаракатлари ҳар томонлама, тўлиқ ва холисона ўтказилиши ва натижаси бўйича қонуний қарор қабул қилиниши таъминланади”, — дейилади хабарда.
Изоҳ (0)