Марғилонда Gentra кўчада ўйнаб ўтирган ёш болани босиб кетганди. “Ruxsor TV” телеканалининг хабар қилишича, ҳайдовчига 2 йилга барча турдаги транспорт воситаларини бошқариш ҳуқуқидан маҳрум қилган ҳолда 2 йил озодликни чеклаш жазоси тайинланди.
Воқеа 2025 йил 10 май куни Марғилон шаҳар Зуҳро кўчасида содир бўлганди. 55 ёшли аёл Д.А. Gentra автомобилини бошқариб кетаётиб, 2022 йилда туғилган А.А.ни босиб кетган. Кўчада ўрнатилган кузатув камерасига муҳрланган видеода автомобиль йўлда ўйнаб ўтирган боланинг устидан босиб ўтгани, ҳайдовчи боланинг бақирганини эшитмай, ўз йўлида бамайлихотир давом этиб, ҳодиса жойидан кетиб қолгани акс этган.
Судда аёл болани кўрмай қолганини, ҳатто босиб ўтганда йиғлаган овозини эшитмаганини айтган.
“Билганимда дарров тўхтардим. Масалан, итни эзиб кетсангиз ҳам тўхтайсиз-ку. Келганимда ҳам йўқ, мен босмадим, дедим. Йиғлаганини ҳам эшитмабман. Камерадан кўрдим. Телефон бўлди, биттасини уриб кетибсиз, оёғи ва қўли шилинибди, дейишди. Кўриб, кетиб қолибсиз, дейишди. Камерани кўринглар, мен урганим йўқ, деб тан олмадим. Кейин эртасига ўша камерани кўришган экан, мен эканман”, деган у ўз кўрсатмасида. У 5 йил аввал ҳайдовчилик курсини тамомлаб, ҳайдовчилик гувоҳномаси олганини билдирган.
Ҳолат юзасидан Жиноят кодексининг 266-моддаси 1-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) ҳамда 117-моддаси (хавф остида қолдириш) билан жиноят иши қўзғатилганди.
Боланинг отаси судда фарзандининг руҳий ҳолати ўзгарганини, ҳайдовчи 3 ой ўтган бўлса-да, бирор марта қўнғироқ қилмаганини маълум қилган.
“Битта гапни гапирсангиз, қўрқиб кетади. Кўчага олиб чиқсангиз, машина келса, уйга кираман, дейди. Олдин доим кўчада бўлган, ўйнаган, бошқа қилган, уйга кирмайман дейдиган бола ҳозир уйдан кўчага чиққиси келмайди”, деган у.
Ота суддан ҳайдовчи аёлга нисбатан қонуний чора кўришни, етказилган моддий зарар билан маънавий зарарни ҳам қоплаб беришини сўраган. Суд ҳукми билан ҳайдовчига юқоридаги жазо билан бирга боланинг отасига 2 миллион 350 минг сўм моддий ва 25 миллион сўм миқдорда маънавий зарар ундириш белгиланди.
Жиноят кодексига кўра, ҳаёти ёки соғлиғи хавф остида қолган ва ўзини ўзи ҳимоя қилиш имкониятидан маҳрум бўлган шахсга ёрдам кўрсатмаслик, башарти, айбдор бундай аҳволдаги шахсга ёрдам бериши шарт ва бундай имкониятга эга бўлса ёхуд айбдорнинг ўзи жабрланувчини хавфли аҳволга солиб қўйган ва бу ҳол баданга ўртача оғир ёки оғир шикаст етказилишига олиб келса 300 соатгача мажбурий жамоат ишлари ёки 2 йилгача ахлоқ тузатиш ишлари билан жазоланади.
Кодекснинг 266-моддаси 1-қисмида белгиланишича, транспорт воситасини бошқарувчи шахс томонидан транспорт воситалари ҳаракати ёки улардан фойдаланиш хавфсизлиги қоидаларини бузиш баданга ўртача оғир ёки оғир шикаст етказилишига сабаб бўлса, 3 йилгача муайян ҳуқуқдан маҳрум қилиб, БҲМнинг 50 бараваригача миқдорда жарима ёки 3 йилгача озодликни чеклаш ёхуд 3 йилгача озодликдан маҳрум қилиш билан жазоланади.
Изоҳ (0)