Собиқ қишлоқ хўжалиги вазири Азиз Воитов ва 49 нафар судланувчи ишини кўраётган суд Жиноят ишлари бўйича Юнусобод туман суди биносида навбатдаги мажлисини давом эттирди. Бу ҳақда судда иштирок этган “Дарё” журналисти хабар берди.
Суд мажлиси Жиноят ишлари бўйича Миробод туман суди раиси Сардор Содиқов раислигида давом эттирилиб, судланувчилар шахсига аниқлик киритилиб, уларнинг ҳуқуқ ва мажбуриятлари тушунтирилди.
Судда сўз олган адвокатлардан бири Темур Раҳматов интернет нашрларининг бирида собиқ вазир Азиз Воитов иши судда кўриб чиқилгани ва 7 йилга озодликдан маҳрум қилингани ёзилганини айтиб, журналистларни нотўғри ахборот тарқатаётганликда айблади.
Судда раислик қилувчи Сардор Содиқов ОАВ вакиллари ҳамда адвокатларга мурожаат қилиб, судда шаффофлик таъминланиши кераклигини, бироқ бу судланувчиларнинг ҳақ-ҳуқуқларини поймол этмаслиги кераклигини таъкидлади.
Суд жараёнини ёритишда айбсизлик презумпсиясига амал қилиниши шарт, деди суд мажлиси раиси.
Судда сўз олган ва исм-шаърифини айтмаган яна бир адвокат судда қатнашаётган журналистлар хорижликлар агенти бўлиши мумкинлигини айтиб, шу боис уларга судни ёритишни тақиқлаш кераклигини таклиф қилди. Бунга жавоб берган Сардор Содиқов ОАВ вакиллари суд мажлисига ҳужжат асосида киритилаётганини, уларнинг қайси ОАВ вакили экани масъулларга аниқ эканини билдирди.
Мазкур муҳокамалар давомида судланувчилардан бири ҳам сўз олиб, собиқ вазир масаласига оид ишлар интернетда ёзилганидан сўнг уни ҳам қамаб қўйишганини гапириб, судда ОАВ вакилларини “кўришга кўзи йўқлигини” билдирди. “Етти ой олдин тергов бошланган пайтда қаерда эдингиз?”, дея ўпкалади.
Журналистлар эса тергов жараёнлари кетаётган пайтда ОАВ вакиллари терговга халал бермаслигини, шу сабаб тергов жараёнлари тугамасдан туриб, бу ҳақда ёзиш мумкин эмаслигини тушунтирди.
Суд ишига раислик қилувчи Сардор Содиқов мажлис 2024 йилнинг 6 сентябрь куни соат 15:00 га қадар тўхтатилишини, танаффусдан сўнг адвокатлар ва судланувчиларнинг ОАВ иштирокига муносабати ҳақидаги илтимосномаларни эшитиб, судда ОАВ вакилларининг иштироки муҳокама қилинишини, муҳокамадан сўнг мажлисда журналистларнинг фото, видео ва аудиоматериаллар олишига рухсат бериш ёки бермаслигини билдирди.
2022 йилнинг август ойида қишлоқ хўжалиги вазири лавозимига тайинланган Азиз Воитов 2023 йилнинг октябрь ойида президент қарори билан ишдан олинди. Кўп ўтмай, аниқроғи шу йилнинг декабрь ойида унинг қамоққа олингани, бунга жиноят ишлари бўйича Яшнобод туман судида бош прокурор ўринбосари собиқ вазирни Жиноят кодексининг 167-моддаси (ўзлаштириш ёки растрата йўли билан талон-торож қилиш) 3-қисми “а” банди ва 205-моддаси (ҳокимият ёки мансаб ваколатини суиистеъмол қилиш) 2-қисми “а” бандида назарда тутилган жиноятларни содир этганликда айблагани очиқланиб, гумон қилинувчи Жиноят-процессуал кодексининг 221-моддаси (ушлаб туриш асослари) тартибида ушлангани аниқ бўлди. Бир неча ой давом этган терговлардан сўнг, 2024 йилнинг 15 август куни собиқ қишлоқ хўжалиги вазири Азиз Воитовга нисбатан жиноят иши судда кўрила бошланди.
Изоҳ (0)