Алимент тўламагани учун қидирувда бўлган ота Орол денгизи бўйидан топилди 

Алимент тўламагани учун қидирувда бўлган ота Орол денгизи бўйидан топилди, деб хабар бермоқда МИБ ахборот хизмати “Дарё”га.

Маълум қилинишича, Мажбурий ижро бюроси Қўнғирот туман бўлими иш юритувидаги Фуқаролик ишлари бўйича Нукус туманлараро суди буйруғига асосан қарздор Т.Ф.дан вояга етмаган фарзандлари таъминоти учун собиқ турмуш ўртоғи фойдасига алимент ундириш белгиланган.

Қарздор алимент пулларини тўлашдан қочиб юргани сабабли унга нисбатан Мажбурий ижро бюроси Қўнғирот туман бўлими давлат ижрочиси томонидан 2023 йили қидирув эълон қилинган.

Қарздор Т.Ф.нинг алимент тўловларидан қарздорлиги ҳозирда 18,2 млн сўмни ташкил этган. Бюронинг Қорақалпоғистон Республикаси бошқармаси қидирув шўбаси ходимлари томонидан олиб борилган маълумотларни тўплаш тадбирлари давомида қарздор Т.Ф Мўйноқ тумани, Орол денгизи бўйи ҳудудларида ишлаб юргани аниқланган. 

Бюронинг Қорақалпоғистон Республикаси бошқармаси ва Қўнғирот туман бўлими ходимлари томонидан биргаликда амалга оширилган тезкор қидирув тадбирларида қидирувда бўлган қарздор Т.Ф. Орол денгизи бўйида артемия систасини йиғиш билан шуғулланиб юрганида топилган. 

Қарздорга нисбатан маъмурий баённома расмийлаштирилиб, тўпланган ҳужжатлар Жиноят ишлари бўйича Қўнғирот туман судига юборилган ва ушбу суд томонидан қарздор Т.Ф.га нисбатан 15 сутка маъмурий қамоқ жазоси қўлланган.