Тошкент шаҳридаги Шайхонтоҳур туманида жойлашган мактаб ўқувчилари орасида сил касаллиги тарқалгани ҳақида хабарлар пайдо бўлди. Санепидқўмита ва Соғлиқни сақлаш вазирлиги бунга муносабат билдирди.
Қўмита ахборотига кўра, 2024 йилнинг 26 декабрида Шайхонтоҳур туманидаги 59-сонли умумтаълим мактабининг 11-синф ўқувчисида сил касаллиги аниқланган ва шу куни Шаҳар Болалар фтизиатрия шифохонасига ётқизилган. Бемор билан мулоқотда бўлган 22 нафар ўқувчи ва мактабнинг 30 нафар ўқитувчиси 2025 йилнинг 4 январидан бошлаб рентгенография, диаскин тест текширувларидан ўтган.
Касаллик аниқланган ўқувчи амбулатор шароитда даволанмоқда. Эпидемиологик суриштирув ўтказиш натижасида беморнинг оила аъзолари ҳам тегишли текширувлардан ўтказилиб, касаллик аниқланмаган.
Санепидқўмита мутахассислари томонидан ушбу мактабда эпидемиологик ўрганишлар олиб борилиши натижасида мактабда санитария талабларининг қўпол равишда бузилиши, сил касаллиги билан касалланган беморни эрта аниқланмагани ва ўз вақтида чора-тадбирларни ташкил этилмагани ҳамда педагогларнинг даврий тиббий кўрикдан ўтмагани маълум бўлди. Аниқланган камчиликлар юзасидан ушбу мактаб директорига маъмурий баённома расмийлаштирилди.
Қайд этилишича, мактабда бемор билан мулоқотда бўлган ўқувчи ва ўқитувчилар махсус текширувдан ўтказилган, улар орасида касалликни юқтириб олганлар аниқланмаган. Амалдаги тартибга кўра уларда 6 ойдан сўнг қайта текширув ўтказилиши режалаштирилган.
“Шу ўринда ортиқча ваҳимага ўрин йўқлигини, вазият назорат остида эканини эслатиб ўтамиз”, дейилади қўмита муносабатида.
Соғлиқни сақлаш вазирлиги матбуот хизматининг билдиришича, бугунги кунда 59-сонли умумтаълим мактабида давлат дастури асосида капитал реконструкция ишлари олиб борилаётгани сабабли ушбу таълим муассасасининг бошланғич синф ўқувчилари 115-умумтаълим мактабида, юқори синф ўқувчилари эса тумандаги 82-сонли умумтаълим мактабида ўқишни давом эттирмоқда.
21 январда 82-сонли умумтаълим мактабида тегишли зарарсизлантириш ва димлаш тадбирлари такрорий олиб борилди. 2025 йил 22 январь куни эса ялпи тозалаш ва шамоллатиш тадбирлари ўтказилди. Шунингдек, 115-сонли умумтаълим мактабида ҳам 23 январь куни тегишли зарарсизлантириш ва димлаш тадбирлари такрорий ташкил этилди.
Изоҳ (0)