Ўзбекистонда аҳолидан жамоат эҳтиёжлари учун олиб қўйилган ер участкалари учун компенсацияларни тўлиқ тўлаш чоралари кўрилади. Бу ҳақда 3 июнь куни парламент қуйи палатаси мажлисида бош вазир ўринбосари, иқтисодиёт ва молия вазири Жамшид Қўчқоров маълум қилди.
Қонунчилик палатаси мажлисида Жамшид Қўчқоров давлат бюджетининг 2023 йил ҳамда 2024 йилнинг I чорагидаги ижроси бўйича ахборот берди. Мулоқотда депутат Дониёр Ғаниев бюджет ҳисобидан фуқаролардан жамоат эҳтиёжлари учун олиб қўйилган ер участкалари учун товон пуллари тўлиқ тўлаб берилмаётгани масаласини кўтарди.
“Президент қарорида давлат бюджетига қўшимча манбалардан тушадиган маблағлар, аввало, жамоат эҳтиёжлари учун фуқаролардан олиб қўйилган ерлар учун қарздорликлар мавжуд бўлса, тўланиши, кейин бошқа мақсадларга ишлатилиши белгиланган. Статистикага кўра, 2024 йил I чорагида 712 миллиард сўм қарздорликлардан 418 миллиард сўми тўлаб берилди. Ҳолбуки, жамғармага 108 миллиард сўм ажратилган экан, қарор орқали қўшимча яна 300 миллиард сўм тўлаб берилишига шароит яратилди. Баъзи ҳудудлар, жумладан, Бухоро ва Наманган вилоятлари ҳамда Қорақалпоғистонда қарздорликлар тўлиқ бартараф этилди. Лекин минг афсуски, айрим вилоятларда тўлов масаласи пайсалга солиняпти. Давлат раҳбарининг қарорида белгиланган бўлса–да, қўшимча манбалардан тушадиган маблағларни қарздорликларга йўналтирилмасдан бошқа мақсадларга сарфлаш ҳолатлари кузатилмоқда. Натижада фуқароларнинг 300 миллиард сўмлик мулкий зарарлари тўлаб берилмаяпти”, — деди депутат.
Жамшид Қўчқоров мазкур масала юзасидан гапираркан, қарздорликларни тўлиқ ёпиш чоралари кўрилишига ваъда берди.
“Жамоат эҳтиёжлари учун олиб қўйилган ер участкалари учун компенсация тўлашга маблағлар етарли. Сиз айтган рақамларни кўриб чиқишимиз керак. Жамоат эҳтиёжлари учун олиб қўйилган ер участкалари учун етказилган зарар ўрнини қоплаш бўйича энг катта қарздорлигимиз Тошкент шаҳри, Сурхондарё ва Самарқанд вилоятларига тўғри келяпти. Ундан кейин Андижон вилотяти турибди. Бу қарздорликларнинг ҳар бирини ёпиш бўйича чоралар кўрамиз, буни ишонтириб айтаман. Ушбу соҳадаги вазиятни кескин яхшилаш чораларини кўрамиз”, — деди вазир.
Аввалроқ Бухоро шаҳрида “Боқий Бухоро” парки қурилиши учун аҳоли ва ишбилармонларга тегишли бинолар “снос” объекти сифатида баҳоланиши жамаотчилик муҳокамаларига сабаб бўлганди.
Изоҳ (0)