Навоий вилояти Нурота тумани ҳудудида содир бўлган йўл-транспорт ҳодисаси оқибатида 6 киши ҳалок бўлди.
Қайд этилишича, 9 июнь куни соат 15:00 лар атрофида Нурота туманига кираверишдаги “Деҳибаланд” қишлоғи ҳудудидан ўтган Навбаҳор—Нурота йўлида ҳаракатланиб бораётган Gentra русумли транспорт воситаси ҳайдовчиси ўзи билан бир йўналишда кетаётган Damas машинасини қувиб ўтмоқчи бўлган вақтида қарама-қарши томондан келаётган Onix билан тўқнашган.
“Халқ сўзи”нинг вилоят ИИБ Йўл ҳаракати хавфсизлиги бошқармасидаги манбасига кўра, ҳодиса оқибатида Onix машинаси салонида бўлган бир оиланинг 5 нафар аъзоси: 36 ёшли эркак, унинг 58 ёшли онаси, турмуш ўртоғи, 2 ёшли ўғли ҳамда 2 ойлик қизи, шунингдек, Gentra ҳайдовчиси бўлган эркак ҳалок бўлган.
Таъкидланишича, ЙТҲ қурбонларининг икки нафари воқеа жойида, 4 нафари эса шифохонада вафот этган. Ҳозирда ҳолат юзасидан дастлабки суриштирув ишлари олиб борилмоқда.
Аввалроқ Андижон вилоятида ҳайдовчилик гувоҳномасига эга бўлмаган йигит машина бошқариб, автоҳалокат содир этгани, Тошкент вилоятида бошқарувни йўқотган Damas транспорт воситаси каналга тушиб кетгани тўғрисида хабар берилганди.
Изоҳ (0)