Ўзбекистонда “қонундаги ўғри — Бахти Ташкентский” мақомини олган Бахтиёр Қудратуллаев ва 36 нафар айбланувчи бўйича давом этаётган суд мажлисида журналистларга видео ҳамда аудиомаълумотлар олишига чек қўйилгани хабар берилганди.
Бу ҳақдаги хабарларга Судьялар олий кенгаши ахборот хизмати муносабат билдирди.
Б.Қудратуллаев (“Бахти Ташкентский”) ва бошқаларга оид жиноят иши очиқ суд мажлисида кўриб чиқилаётган бўлса-да, раислик этувчи томонидан оммавий ахборот воситалари ходимларига суд жараёнини видеотасвир ва аудиога олиш чеклангани муҳокамаларга сабаб бўлмоқда. Мазкур жиноят иши бўйича аввалги суд мажлисидан олинган лавҳалар қатор оммавий ахборот воситалари ва ижтимоий тармоқдаги каналларда турлича талқинлар билан эълон қилингани, натижада жамоатчиликда нотўғри тасаввурлар шаклланишидан ташқари судга нисбатан ижтимоий босим эҳтимолини ҳам пайдо қилмоқда.
Шундан келиб чиқиб, раислик этувчи томонидан зарур процессуал чоралар кўрилиши мутлақо табиий, Қонун бунга изн беради (ЎзР ЖПК, 408-модда). Қолаверса, бундай тартиб халқаро амалиётда ҳам кўплаб кузатилади, — дейилади расмийлар изоҳида.
Қўшимча қилинишича, судьянинг бу ҳаракати суд жараёнини умуман ёритмаслик керак деган мазмунни бермайди.
Суднинг мазкур ажрими суд мажлисида журналист ва блогерларнинг иштирокини узил-кесил тақиқламайди. Яъни, улар жараённи бевосита кузатиши, ўзлари учун зарур қайдлар қилиб бориши ҳамда турли башорат ва тахминларга берилмаган ҳолда ахборотлар эълон қилишига монеълик йўқ, — дейди масъуллар.
Изоҳ (0)