Ўзбекистонда йилда уч марта ўтказиладиган “Эл-юрт умиди” жамғармаси стипендияси учун танловларнинг биринчи қисми кечикмоқда. Кеча, 3 июнь куни Олий Мажлис Қонунчилик палатаси йиғилишида депутат Дониёр Ғаниев масъуллардан бу кечикишнинг сабабини сўради.
Йиғилишда Дониёр Ғаниев танлов эълон қилинмаётганидан юзлаб ёшлар хавотирда эканини айтиб, бюджет тақчиллигини қисқартиришда жамғарма маблағларини камайтириш кўзда тутилмаяптими, деган мазмунда савол берди.
Иқтисодиёт ва молия вазири ўринбосари Отабек Фозилкаримов саволга жавоб қайтарар экан, стипендиялар учун ажратилаётган маблағлар қисқартирилмаслигини айтди.
“Эл-юрт умиди” жамғармасига 2023 йилда давлат бюджетидан 200 миллиард сўм ажратилган ва хорижда таълим олишлари учун 965 нафар талабалар харажатлари қопланган. 2024 йилда эса жамғармага 550 миллиард сўм ажратиш режалаштирилган. Яъни бу ўтган йилдагидан 2,5 баравар кўп. Жорий йилда шунга мувофиқ равишда қабул квоталари ҳам ошади. Хавотирга ўрин йўқ. Ушбу маблағларни мақбуллаштириш бўйича бизда чора кўрилаётгани йўқ. Жамғармага масъул бўлган Президент ҳузуридаги бошқарув академияси тайёрлаган лойиҳа бор. Қабул квоталари ошгани сабаб кечикишлар юзага келмоқда”,—деди вазир ўринбосари.
Кун якунида “Эл-юрт умиди” жамғармаси ҳам Telegram каналида танловлар кечикаётгани юзасидан расмий изоҳ берди.
“Эл-юрт умиди” жамғармаси томонидан яқин кунлар ичида 2024 йилги 1-очиқ стипендия танловларини эълон қилиш режалаштирилмоқда. Жамғарма фаолияти трансформация бўлаётгани сабабли танлов эълон қилишда бир оз кечикишлар бўлмоқда. 2024 йил 1-очиқ стипендия танлови учун 500 ўрин ажратилган бўлиб, квота ва стипендиатлар учун ажратилган маблағлар қисқартирилмаган”, — дейилади изоҳда.
Маълумот учун, “Эл-юрт умиди” жамғармаси президент фармони билан 2018 йил 25 сентябрда ташкил этилган. У нуфузли хорижий университетларга қабул қилинган талабаларга ўқиш пулларини тўлашда кўмаклашиб келади.
Танловдан ўтган стипендиатларга жамғарма стипендиялари қуйидаги харажатларни қоплаш учун ажратилади:
- хорижий таълим ва илмий муассасаларда ўқиш қийматининг тўлови;
- виза олиш харажатлари;
- барча турдаги транспорт воситалари билан ўқиш жойига қадар йўлкира харажатлари (йилда бир мартадан ортиқ бўлмаган);
- борган мамлакатдаги ўқиш даврида яшаш, овқатланиш ва транспорт харажатлари;
- зарур ўқув ва илмий адабиётлар, дарсликлар харид қилиш;
- хорижда ўқиш даврида стипендиатларни тиббий суғурталаш харажатлари.
Жамғарманинг молиявий кўмаги билан магистратура ёки докторантура дастурлари бўйича таълим олган стипендиатлар тузилган шартномада белгилаб қўйилган муддат давомида давлат ташкилотларидан бирида ишлаб бериш мажбуриятини зиммасига олади.
Изоҳ (0)