Ўзбекистонда 8 та ОТМда чет тилидан ижодий имтиҳон олиш амалиёти бекор бўлди

Ўзбекистонда 2024 йилда чет тили биринчи фан бўлган мутахассисликларда ижодий имтиҳон ўтказиладиган 8 та ОТМда кириш имтиҳони сифатида тест олинади.

Қайд этилишича, 2024 йилгача ушбу ОТМнинг чет тили биринчи мутахассислик фан бўлган йўналишларида абитуриентлардан тест эмас, ижодий имтиҳон олинарди. Бу йилги қабулда мана шу ОТМда ҳам ижодий имтиҳон ўрнига тест бўлади ва бу ОТМга топширадиган абитуриентлар ҳам ўтган йилдаги каби фақат шу ОТМ доирасида эмас, республикадаги барча ОТМдан ўз йўналишига тўғри келган 5 тасини танлаши мумкин бўлади.

Олий таълим, фан ва инновациялар вазирлиги департамент бошлиғи Абдували Холиқов “Кун.уз”га берган интервьюсида ушбу рўйхатдаги ОТМда ҳам бошқа чет тили йўналиши бор ОТМ каби тест имтиҳони ўтказилишини маълум қилди: 

• Ўзбекистон давлат жаҳон тиллари университети;
• Самарқанд давлат чет тиллар институти;
• Тошкент давлат шарқшунослик университети;
• Тошкент давлат педагогика университети;
• Қўқон давлат педагогика институти;
• Нукус давлат педагогика институти;
• Андижон давлат чет тиллар институти;
• Наманган давлат чет тиллар институтининг хорижий тиллар бўйича педагогларни тайёрловчи бакалавриат таълим йўналишлари.

Президент фармонида 2025/2026-ўқув йили қабулидан бошлаб фанлар мажмуасида чет тили биринчи фан сифатида белгиланган таълим йўналишларига қабул хорижий тилни билиш даражасини белгиловчи миллий ёки халқаро сертификат асосида амалга оширилади, дейилган.

Бу кейинги йилдан чет тили биринчи фан бўлган барча йўналишларга ҳужжат топширувчи абитуриентлар учун сертификат мажбурий бўлишини англатади. Агар кейинчалик қайсидир йўналишга чет тили биринчи фанга айлантирилса ҳам, шу йўналишга топширувчи абитуриент учун сертификат талаби мажбурий бўлади. Бу ҳақда бир йил олдиндан абитуриентларни огоҳлантиряпмиз: кейинги йилдан чет тили биринчи фан бўлган йўналишларга топширувчи абитуриентлар ҳозирдан ҳаракат бошлаши керак, — дейди Абдували Холиқов.

Бундан олдин магистратура ва докторантурага айрим йўналишларда хорижий тил билиш сертификати даражаси пасайтирилгани тўғрисида хабар берилганди.