Ижтимоий тармоқларда Ўзбекистон терма жамоаси 10 октябрь куни Бразилия терма жамоаси билан ўйнаши мумкинлиги борасида хабарлар тарқалди. Wikipediaъда қайд этилишича, Темур Кападзе жамоаси Япониянинг Сайтама шаҳрида “пентакамеонлар”га қарши ўртоқлик учрашуви ўтказади.
“Дарё” ушбу маълумот юзасидан Ўзбекистон футбол ассоциацияси билан боғланди. Улар ушбу маълумот ҳақиқатдан йироқ эканлиги, шунингдек, агар Ўзбекистон миллий терма жамоаси Жаҳон чемпионати йўлланмасини қўлга киритилса, кузда бўладиган FIFA кунларида кучлироқ терма жамоаларга қарши учрашувлар ташкил қилиниши мумкинлиги, аммо Бразилия терма жамоаси билан ўртоқлик учрашуви ўтказилиши борасида ҳеч қандай маълумот йўқлигини билдирди.
Таъкидлаш керакки, Wikipediaъда Бразилия терма жамоаси октябрь ойида Японияда иккита ўртоқлик учрашуви ўтказиши белгиланган. Улардан бири кунчиқар юрт вакилларига қарши ўтказилади. Мазкур баҳс 14 октябрга белгиланган. Аммо “пентакампеонлар” 10 октябрда қайси жамоага қарши майдонга тушиши қайд этилмаган.
Эслатиб ўтамиз, Ўзбекистон терма жамоаси 5 июнь куни Жаҳон чемпионати саралаши доирасидаги БААга қарши учрашувда майдонга тушади. Шунингдек, 10 июнь куни Тошкентда Қатарни қабул қилади. Темур Кападзе жамоаси мазкур баҳсларда ўзига керакли очколарни қўлга кирита олса, мундиал масаласини ҳал қилади.
Маълумот учун, Ўзбекистон ҳозирда А гуруҳида 17 очко билан 2-ўринни эгаллаб турибди. Уларнинг энг яқин таъқибчиси БАА ҳисобида 13 очко мавжуд.
Изоҳ (0)